Həkim Bəhram Bağırzadənin hazırkı durumunu açıqladı

Həkim Bəhram Bağırzadənin hazırkı durumunu açıqladı

"Əməkdar artist Bəhram Bağırzadənin ECMO cihazı ilə müalicəsi davam edir. Bu günə qədər səhhətində mənfi dinamikanın olmaması, eləcə də laborator analizlərdə kiçik də olsa müsbət dəyişikliklərin olması ümidvericidir”.
Bunu "Report”un sorğusuna cavab olaraq Dövlət Gömrük Komitəsi Tibbi Xidmət İdarəsinin Elmi Təcrübi və Tədris Mərkəzinin rəisi, deputat Rəşad Mahmudov deyib.

O qeyd edib ki, dünya təcrübəsinə əsasən ağciyər zədələnməsi olan xəstənin müalicəsinin qısa müddətdə müsbət nəticə verməsi mümkün deyil: "Ən vacib məsələ tibbi cəhətdən digər orqanların funksiyalarının qorunması və ECMO cihazının fəaliyyətinin davam etdirilməsidir. Yəqin ki, bu müalicə üsulu uzun müddət davam edəcək”.
R.Mahmudov eyni zamanda B.Bağırzadəyə bu vəziyyətdə ağciyər köçürülməsi məsələsinin gündəmdə olmadığını bildirib: "Bu vəziyyətdə orqan köçürülməsindən söhbət gedə bilməz və bu dünyanın hər yerində belədir. Bu sırf xüsusi hallarda icra oluna bilər. Bəhram Bağırzadənin müalicəsi prosedurunda heç bir əksiklik yoxdur”.
Qeyd edək ki, Azərbaycanın əməkdar artisti Bəhram Bağırzadə koronavirus infeksiyasına yoluxub. O, vəziyyətinin kəskin pisləşməsi səbəbindən əvvəl müalicə olunduğu xəstəxanadan iyunun 13-də Mərkəzi Gömrük Hospitalının reanimasiya şöbəsinə köçürülüb.
Əməkdar artistin 90%-dən çox ağciyər toxumasının zədələndiyindən onu ECMO cihazına qoşublar.
B.Bağırzadənin müalicəsi birbaşa Azərbaycanın Birinci vitse-prezidenti Mehriban Əliyevanın nəzarətindədir.
Xatırladaq ki, ECMO ekstrakorporal membran oksigenlənmə cihazı olub, ağciyər və ürək yerinə 2-3 həftə funksiya göstərərək, mövcud olan problemin həlli üçün həkimlərə vaxt qazandıran bir müalicə üsuludur.
Xəbər 545 dəfə oxunub.

YAZARLARIMIZ

SEÇİLMİŞ

SON XƏBƏRLƏR