Dünyanın ən zəngin və nüfuzlu iş adamlarından biri olan İlon Mask, qlobal əmək bazarının gələcəyi ilə bağlı növbəti səs-küy yaradan bəyanatını verib. Milyarder iş adamı ABŞ-da getdikcə dərinləşən işsizlik təhlükəsi ilə mübarizə aparmağın ən effektiv yolunun federal hökumət tərəfindən əhaliyə birbaşa pul paylanması, yəni vahid baza gəlirinin tətbiqi olduğunu bildirib.
Aktual.az xəbər verir ki, Maskın bu radikal təklifi birbaşa süni intellektin və robototexnikanın insan faktorunu əmək bazarından sürətlə sıxışdırıb çıxarması reallığına əsaslanır. O hesab edir ki, texnoloji inqilab nəticəsində bir çox peşələrin sıradan çıxması qaçılmazdır və bu vəziyyətdə dövlətin vətəndaşlara maliyyə dəstəyi verməsi sadəcə bir seçim deyil, həm də sosial sabitliyi qorumaq üçün zərurətdir. Milyarderin qənaətinə görə, hökumətin həyata keçirəcəyi bu ödənişlər insanların alıcılıq qabiliyyətini qorumaqla yanaşı, onlara yüksək həyat standartlarını təmin etmək imkanı verəcəkdir.
İqtisadçıların əksər hallarda pul kütləsinin artırılmasının inflyasiyaya səbəb olacağı ilə bağlı narahatlıqlarına da münasibət bildirən Mask, tamamilə yeni bir iqtisadi model təsvir edib. O, "X” sosial şəbəkəsindəki hesabında qeyd edib ki, süni intellekt və avtomatlaşdırılmış sistemlər mal və xidmət istehsalını elə bir həcmə çatdıracaq ki, bu artım dövriyyədəki pul kütləsinin artımını xeyli üstələyəcək. Başqa sözlə, istehsalatdakı ağlasığmaz məhsuldarlıq bolluq yaradacağı üçün əhaliyə paylanan vəsait qiymət artımına deyil, əksinə, rifahın yüksəlməsinə xidmət edəcək. Maskın fikrincə, bu yeni erada robotlar hər şeyi daha ucuz və sürətli istehsal etdiyi üçün inflyasiya təhlükəsi aradan qalxacaq və bəşəriyyət işsizliyin fəsadlarından sığortalanmış olacaq./noccomment