Nazirlik məsələni araşdırır.

Bu gün İranın Xuzestan əyalətini toz dumanı bürüyüb.

Aktual.az Oxu.Az-a istinadən xəbər verir ki, toz dumanından Abadan və Xorəmşəhr şəhərinin sakinləri gündəlik işlərini görməkdə çətinlik çəkiblər, evlərindən bayıra çıxa bilməyiblər və məktəblərdə dərslər dayandırılıb.

Məlumatda tozun Səudiyyə Ərəbistanı və İraqdakı qumluqlardan gəldiyi bildirilir.

Məsələ ilə bağlı Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamentinin direktor müavini Mətanət Avazova Oxu.Az-a bildirib ki, hazırda nazirliyin əməkdaşları bu məsələni araşdırırlar:

“Biz bu dəqiqələrdə elə müşahidə aparırıq. Hazırda bizdə cənub-şərq küləyi əsir. Səudiyyə Ərəbistanı və İraqdakı qum tozlarının 24 saat ərzində Azərbaycana keçməyi ehtimalı yoxdur”.

Nazirliyin əməkdaşı bildirib ki, Bakıda müşahidə olunan dumanlı havanın İranda baş verən toz dumanı ilə heç bir əlaqəsi yoxdur:

“Bakı hazırda müşahidə olunan duman metroloji səbəbdən yaranıb və bu toz dumanı deyil”.