Dünya Gənc Türk Yazarlar Birliyinin Azərbaycan Respublikası Prezidenti Yanında Gənclər Fondunun dəstəyi ilə başladığı "Bakıdan Türk dünyasına" adlı layihə çərçivəsində Azərbaycanda səfərdə olan Türk dünyası gənc şair, yazar və aydınları millət vəkili, siyasi elmlər doktoru Q.Paşayeva ilə görüşüb və geniş fikir mübadiləsi olub.
Millət vəkili, Avrasiya Beynəlxalq Araşdırmalar İnstitutu  İB-nin sədri Q.Paşayeva onların hər biri ilə söhbət edərək görüşün sonunda onlara Azərbaycan mədəniyyətinə dair hədiyyələr təqdim edib və ölkələrinə döndükdən sonra Azərbaycanın təbliğatı və əməkdaşlığımızın daha da genişləndirilməsi istiqamətində daha fəal çalışacaqlarına inandığını deyib. Bu cür layihələrin önəminə toxunan millət vəkili Q.Paşayeva təşkilatçılara təşəkkürünü bildirib və bu kimi layihələrin davamlı olmasının vacibliyni xüsusi vurğulayıb.
Millət vəkili, siyasi elmlər doktoru Q.Paşayeva Dünya Gənc Türk Yazarlar Birliyinin Azərbaycan Respublikası Prezidenti Yanında Gənclər Fondunun dəstəyi ilə başladığı "Bakıdan Türk dünyasına" adlı layihə çərçivəsində Azərbaycan Dövlət Pedaqoji Universitetdə keçirilən tədbirdə də iştirak edib və Türk dünyasına çağırış edərək, "bir-birimizi daha çox dəstəkləməliyik”-, deyib.  
Q.Paşayeva Türk kökənli bütün insanlarımızı Türk dünyasının müxtəlif bölgələrində yaşadığımız ağrı-acılara xüsusi həssaslıq göstərməyə çağıraraq, bunun vacibliyindən geniş danışıb. Türkiyənin bir sıra rəsmi şəxsləri, ziyalıları, KİV nümayəndələri, Türk dünyasının müxtəlif bölgələrindən gəlmiş tanınmış şair, yazar, aydın və ictimai fəalların qatıldığı tədbirdə millət vəkili Türk Dünyası aydınlarına, şair, yazar və KİV-lərinə səslənərək, topluma örnək olaraq, bugünki və gələcək nəsillərə birlik və bərabərliyimizin nə qədər vacib və önəmli olduğunu daha çox anlatmalıyıq deyib:"Bunun üçün isə ilk növbədə biz biri-birimizi daha yaxından tanımalıyıq, ortaq tariximizi, köklərimizi, mədəniyyətimizi, ədəbiyyatımızı, musiqimizi, keçmiş və bu günümüzü, problemlərimizi, gələcəyə baxışlarımızı gənclərimizin daha yaxşı bilməsinə çalışmalıyıq."
Bu gün Türk dünyasının müxtəlif bölgələrində Türk kökənli insanların yaşadığı ağrılardan, əziyyət çəkdiyi problemlərdən danışan millət vəkili: "Güc birlikdədir və birlikdə bizə qarşı ədalətsizliklərə qarşı daha güclü mübarizə apara bilərik,”-deyib. Bölgədə son günlər daha da gərginləşən vəziyyət barədə geniş çıxış edən millət vəkili, siyasi elmlər doktoru Q.Paşayeva bildirib ki, qardaşlıq yaxşı gündə də, çətin gündə də birlikdə olmaqdır. O, Azərbaycan xalqının hər zaman qardaş Türkiyənin, digər Türk dövlət və toplumlarının yanında olduğunu da xüsusi vurğulayıb. "Azərbaycan bizim olduğu qədər sizin, Türkiyə də buradakı insanımız qədər bizim, sizin yaşadığınız o gözəl yurdlarımız da sizin olduğu qədər də bizimdir, bizim də Vətənimizdir. Bu düşüncəyə və birliyə gəncliyimizin daha çox sahib olması gərəkir və inanıram ki, gənclərimizin əksəriyyəti, məhz, bu ruh və düşüncəyə sahib olacaqlar”, -deyə millət vəkili qeyd edib.
Q.Paşayeva çıxışında Azərbaycanın və Türk dünyasının ən böyük problemlərindən olan Qarabağ problemindən də danışaraq bildirib ki, harada doğulmasından və harada yaşamasından asılı olmayaraq, hər bir Türk insanı Qarabağ həqiqətlərinin dünyaya çatdırılması üçün çalışmalıdır: "Bir türk xalqının, toplumunun problemi, bütün türk xalqlarının ortaq problemidir. Ona görə də Türk dünyasıyla bağlı məsələlərdə bir-birimizə hər zaman böyük dəstək olmalıyıq. Bu məsələdə ailələrimizin, eləcə də aydın, şair, yazar və jurnalistlərin üzərinə çox böyük missiya düşür”,-  deyə millət vəkili onları daha da fəal olmağa çağırıb.