Q. Paşayeva AŞ Nazirlər Komitəsinə sədrlik edən Estoniya baş nazirindən Dağlıq Qarabağ problemi ilə bağlı həyata keçirilməyən qətnamələr barədə soruşub.
Avropa Şurası Parlament Assambleyasının (AŞPA) yay sessiyasının plenar iclasında hazırda Avropa Şurası Nazirlər Komitəsinə sədrlik edən Estoniyanın baş naziri Taavi Roivas Assambleya üzvləri qarşısında çıxış etdikdən sonra Assambleya üzvlərinin suallarını cavablandırdı. Azərbaycanın AŞPA-dakı nümayəndə heyətinin üzvü Qənirə Paşayevanın “Cənab Baş nazir sizin də söylədiyiniz kimi həllini tapmamış münaqişələr barədə soruşmaq istəyirəm. Dağlıq Qarabağ, Abxaziya, Cənubi Osetiya, Dnesrtyanı münaqişələr uzun illərdir ki həllini tapmır. Bunun əsəs səbəblərindən biri beynəlxalq təşkilatların bu münaqişələrlə bağlı qəbul etdiyi qətnamələrin indiyədək yerinə yetirilməməsidir. BMT Təhlükəsizlik Şurası, AŞPA-nın qəbul etdiyi qətnamələr kağız üzərində qalıb və həyata keçirilmir. Sizcə bu qətnamələrin yerinə yetirilməsi üçün daha nələr edilməlidir, hansı mexanizmlərə əl atılmalıdır. Sizin nazirlər komitəsinə sədrliyiniz dövründə bu məsələ, eyni zmanda münaqişələrin həlli diqqət mərkəzinizdə olacaqmı?” sualına cavab verən Taavi Roivas münaqişələrin daima diqqətdə saxlanılması və onlar üzərində işlərin davam etdirilməsini zəruri hesab edib.
“Bunun ən yaxşı yolu artıq öz aramızda razılığa gəldiyimiz formatı saxlamaqdır. Biz bu məsələni artıq əvvəllər müzakirə etmişik. Əgər biz hansısa qətnamə qəbul etmişik, razılıq əldə etmişiksə, indi biz bu razılıqlara əməl edərək onların üzərində işləməliyik. Əminəm ki, hazırkı məqamda bunun hər hansı bir möcüzəli həlli yolu yoxdur. Biz sadəcə əvvəllər əldə etdiyimiz razılıqlara əməl etməliyik və bu, fikrimcə, hazırda ən yaxşı variantdır, məsələyə yararlı bir yanaşmadır. Biz hamımız istiyərdik ki, bütün münaqişələr dayandırılsın və hesab edirəm ki, bizim, parlamentarların, edə biləcəyimiz işlərdən biri bu kimi məsələləri, onların həlli yolları tapılana kimi, daima gündəlikdə saxlamaq və onlar üzərində işləri davam etdirməkdir. Çünki parlamentarlar əslində təsir etmək gücünü malikdirlər. Və, siz, burada təmsil olunan bütün ölkələrin millət vəkilləri, bundan çox yaxşı bir formada yararlana bilərsiz və bunu etməlisiniz ki, bu münaqişələrin həll üzrə işlər davam etdirilsin”.
