Rusiya prezidenti Vladimir Putinlə Ermənistan prezidenti Serj Sarkisyan arasında ikitərəfli görüş keçirilib. 

AzNews.az Rusiya KİV-lərinə istinadən xəbər verir ki, görüş zamanı Ermənistan prezidenti Dağlıq Qarabağ münaqişəsinin sülh yolu ilə həll olunmasının tərəfdarı olduğunu bildirib: “Atəşkəs rejiminin pozulmasının araşdırılması mexanizminin yaradılması Dağlıq Qarabağ münaqişəsi üzrə danışıqların aparılması üçün yaxşı əsas olacaq”.

“Bizim Qarabağ üzrə mövqeyimiz bəllidir. Biz istəyirik ki, bu məsələ tamamilə sülh yolu ilə həll olunsun. Bu məsələyə ayırdığınız anlayış və səylərə görə Minsk qrupu həmsədrləri sırasında sizə təşəkkürümü bildirirəm”, -deyə Sarkisyan Putinlə görüşündə bildirib.

“Təəssüf ki, bu kimi münaqişələr bir tərəfin istəyilə həll olunmur. Odur ki, əgər əldə etdiyimiz razılaşmaların - atəşkəs rejiminin pozulmasının araşdırılması mexanizmi barədə razılığın implementasiyası üzrə bu gün irəliyə gedə bilsəydik, şad olardıq. Və bu, danışıqlar aparmaq üçün işgüzar əhval-ruhiyyə yaradacaq”, - deyə Ermənistan prezidenti bildirib. 

Putin öz növbəsində bütün bu məsələləri müzakirə etməyə razılaşıb.