Amerika Birləşmiş Ştatlarının (ABŞ) paytaxtı Vaşinqtonda keçirilən 4-cü Beynəlxalq Nüvə Sammiti başa çatıb.

Aktual.az Anspress-ə istinadən xəbər verir ki, 31 mart-1 aprel tarixlərində keçirilən, 52 dövlət və hökumət başçısının iştirak etdiyi tədbirdə Azərbaycanı ölkə prezidenti İlham Əliyev təmsil edib. Sammitdə həmçinin Birləşmiş Millətlər Təşkilatı (BMT), Avropa İttifaqı (Aİ), Beynəlxaslq Polis Təşkilatı (INTERPOL) və Beynəlxalq Atom Enerjisi Agentliyinin (IAEA) nümayəndələri də iştirak ediblər. 

Sammitin ilk günündə ABŞ prezidenti Barak Obama tədbirdə iştirak edən ölkə liderlərinin şərəfinə nahar ziyafəti təşkil edib. Ziyafətdə iştirak edən Azərbaycan prezidenti İlham Əliyevin ABŞ prezidenti Barak Obama, Türkiyə prezidenti Rəcəb Tayyib Ərdoğan və s. ölkə başçıları ilə ayaqüstə görüşü olub. 

Həmçinin prezident İlham Əliyevin ABŞ-ın vitse-prezidenti Co Bayden, dövlət katibi Con Kerri, ABŞ-ın ticarət naziri xanım Penni Pritzker, ABŞ konqresinin bir qrup üzvü və s. şəxslərlə vacib görüşləri olub. Görüş vaxtı ölkələr arasında münasibətlərin inkişafına və regional məsələlərə dair fikir mübadiləsi aparılıb. 

Məlumata görə, sammitin başa çatmasından sonra Azərbaycan prezidenti İlham Əliyev ABŞ-dan ayrılıb.