"Azərbaycanın avtomobil bazarında satış qiymətlərinin artım tendensiyası müşahidə olunur. Xüsusilə də, köhnə avtomobillərin qiymətində daha ciddi artım baş verib”.
Aktual.az xəbər verir ki, bu barədə "Report”a Əmlak Ekspert Mərkəzinin direktoru Ramil Osmanlı məlumat verib.
O deyib ki, bunun səbəbləri məlumdur: "İdxal azalıb, təklif məhdudlaşırsa, bazara çıxarmağa avtomobil yoxdursa, onun qiyməti də artmalıdır. Artım müxtəlif markalar üzrə fərqlidir.
Təqribən qiyməti 10 min manatadək olan avtonəqliyyat vasitələrində 500-1000 manat, 10-20 min manatlıq avtomobillərdə 1500-2000 manat artım var”.
Onun sözlərinə görə, avtomobil bazarında vəziyyət çox gərgindir: "Xüsusilə də nəzərə alsaq ki, maliyyə bazarında vəziyyət dəyişkəndir. Yəni, manatın dollara qarşı məzənnəsi çox tez-tez dəyişir. Bu sahədə fəaliyyət göstərən sahibkarlar da çətinlik çəkirlər.
Təbii ki, onlar həm alıcı qismində çıxış edirlər, əvvəl alıb, sonra satırlar. Bu sahədə vəziyyət o qədər də ürəkaçan deyil”.
R.Osmanlı gələcəklə bağlı proqnoz verməyin düzgün olmadığını deyib: "Proqnozlar bazarı bərbad vəziyyətə qoyur. Onun üçün də proqnoz verməyin tərəfdarı deyiləm”.
Aktual.az
Xəbər 558 dəfə oxunub.
