Dövlət Bayrağı Meydanında Daxili İşlər Nazirliyinin Daxili Qoşunlarının gənc əsgərlərinin təntənəli hərbi andiçmə mərasimi keçirilib.

Aktual.az Lent.az-a istinadən xəbər verir ki, Nazirlikdən verilən məlumata görə, mərasimdə Daxili İşlər Nazirinin müavini - Daxili Qoşunların Komandanı, general-leytenant Şahin Məmmədov iştirak edib.
Qoşunların Veteranlar Şurasının üzvlərinin və əsgər valideynlərinin də qatıldığı mərasimdə əvvəlcə Heydər Əliyevin və respublikamızın suverenliyi, ərazi bütövlüyü uğrunda şəhid olmuş hərbi qulluqçuların xatirəsi bir dəqiqəlik sükutla yad edilib, hərbi orkestrin müşayiəti ilə Dövlət Himni ifa olunub.
Sonra gənc əsgərlər hərbi and içərək, Azərbaycan Respublikasının mənafeyini, onun suverenliyini, ərazi bütövlüyünü və müstəqilliyini şərəflə qoruyacaqlarına söz veriblər.
Daxili İşlər Nazirinin müavini - Daxili Qoşunların Komandanı general-leytenant Ş.Məmmədov hərbi andı qəbul edən gənc əsgərləri əlamətdar gün münasibətilə təbrik edib.
Hərbi andiçmə mərasimi gənc əsgərlərin təntənəli keçidi ilə başa çatıb.
Qeyd edək ki, mərasimdən sonra Daxili İşlər Nazirinin müavini - Daxili Qoşunların Komandanı general-leytenant Ş.Məmmədov Dövlət Bayrağı Meydanına toplaşmış əsgər valideynləri ilə görüşərək onların istək və təkliflərini dinləyib.