Sərfəli avtomobillər də alverçilərin əlinə keçir.

İkinci əl avtomobil bazarında qiymətlər arasında böyük fərq var.

Aktual.az xezerxeber.com-a istinadən xəbər verir ki, söhbət sahibindən, maşın bazarında və salonlarda satılan avtomobillərdən gedir. Bəs bu fərqi yaradan amillər nələrdir?

İstehsal illəri və markaları eyni olsa da, qiymətlər arasında xeyli fərq var. Bu baxımdan salonlarda təklif olunan avtomobillərin qiyməti adətən daha baha olur.

Amma maraqlısı budur ki, bazarlarda satılan avtomobillərdə kifayət qədər fərqlər olur. Söhbət sahibinin satdığı avtomobillə alverçilərin satdığı avtomobillərin qiymətindən gedir.

Ekspertlərin sözlərinə görə, sahibi tərəfindən satılan avtomobillərin qiyməti öz həqiqi dəyəri baxımından daha sərfəlidir. Amma çox vaxt bu cür avtomobillər də alverçilərin əlinə keçir.

Xüsusilə elan saytlarına qoyulan avtomobillərin qiyməti münasibdirsə, həmin avtomobil qısa müddətdə dəllaların əlinə keçir. Bu isə avtomobilin növbəti istifadəçisinə baha başa gəlir.