Brüsseldə verən terror aktından sonra dünya bazarında neftin qiyməti ucuzlaşmağa başlayıb.

Aktual.az Anspress-ə istinadən xəbər verir ki, dünya birjalarında aparılan ticarət əməliyyatlarında Brent markalı neftin qiyməti 0,14% azalaraq 41,48 dollara qədər enib.

WTI -Layt markalı neftin qiyməti də 0,10% aşağı enərək, 41,48 dollar təşkil edib.

Amma partlayışla bağlı xəbərlərdən öncə, neftin qiymətində artım dinamikası müşahidə edilirdi. Belə ki, terror xəbərindən əvvəl, Brent markalı neftin bir barrelinin qiyməti 41 dollar 76 sent, WTI markalı neftin dəyəri isə 41 dollar 77 sent təşkil edib.

Bu gün Brüsselin Beynəlxalq Hava limanında terror aktı törədilib. Bu barədə Belçika hökuməti açıqlama yayıb. Eyni zamanda hava limanında daha bir partlayıcı qurğunun aşkar olunduğu bildirilir.

Hava limanında baş verən partlayış nəticəsində azı 17 nəfər həlak olub.

Yerli KİV-in məlumatına görə partlayıcı qurğunu terrorçu-kamikadze işə salıb.

Maelbek metro stansiyasında baş verən parlayış nəticəsində isə 10 nəfər həyatını itirib.

Bundan əlavə metropolitenin daha bir stansiyasında - Şumanda partlayış baş verib. Bu stansiya Avropa komissiyasının və Avropa İttifaqı Şurasının binalarının yaxınlığında yerləşir.

Terror təhlükəsi yüskək olduğuna görə Brüsselin Cənub vağzalındakı insanlar təxliyyə edilir.