"AXCP sədri Əli Kərimli Britaniya nəşrinə qotur bir məqalə göndərib və bu minvalla 3 gündür sevincək, eyforik vəziyyətdə sosial şəbəkələrdə var-gəl edir, hamının zəhləsini tökür. Ki, ay belə tirajladım, elə yaydım, filan cür sökdüm, feşman cür yığdım, sair, ilaxır. Məqalə də nə məqalə? - Öz dövlətini hədəfə alan məqalə! Həqarət dolu məqalə! Erməni lobbisinin əlinə oynayan, düşmən dəyirmanına su tökən məqalə. Makronun, Şvabenin, Paşinyanın ritorikası ilə yazılan məqalə! Qələmini itiləyib və o ki var döşəyib Azərbaycanın qarasınca. Yaramaz gədə! Vətən xaini! Hələ utanmır, bunun reklamını da edir, binamusluğuna don da geyindirir".
Aktual.az xəbər verir ki, bu fikirləri Demokratik Maarifçilik Partiyasının sədri, Milli Məclisin deputatı Elşən Musayev bildirib.
"Belə şeylə adam fəxrmi edər? Etməz, təbii. Əsla etməz! Əksinə, utanar, yerin dibinə girər. Amma Əli Kərimlinin sifəti, siması, xisləti "podoşva”nın elə bir nadir materialından hazırlanıb ki, bunun genetikasına şərəfsizlik elə bir şəkildə hopub ki, artıq dünya-aləm vecinə deyil. Ona görə də çərənləyə bildikcə çərənləyir. Sərsəmləyə bildikcə sərsəmləyir. Alçala bildikcə alçalır.
Deyir, COP -29 öncəsi həlqələri qırdıq, mühasirədən çıxdıq.
Həlqə sənin gözünə girsin! Hansı həlqədən çıxmısan? Sən axı kimə lazımsan ki, hələ bir həlqədə, mühasirədə də qalasan? Yanında 3-5 adam vardı, onlar da sənə tüpürüb getdilər. Asif Yusifli, digərləri... Bəlkə yalandır?! Öz də niyə getdilər? – Əbədi boykot strategiyana üsyan, etiraz olaraq.
Yaxşı bəs bu məqalənin qəfil peydahlanma səbəbi nədir? Ya da belə deyək: Əli Kərimlinin "sirk meymunu” kimi ortalığa atılmasının təşəbbüskarları kimlərdir? Əlbət ki, erməni lobbisi və xaricdən idarə olunan cəmi anti-Azərbaycan qüvvələri! Düşünüblər, birdəfəlik istifadəyə ən çox yararlı kimdir? Ağıla ilk gələn Əli Kərimli olub. Ona görə də təcili qərar veriblər ki, AXCP sədrini bəlli para (güman ki, hətta qəpik-quruş) müqabilində ürəkləri istəyən kimi Azərbaycana qarşı danışdırsınlar. Kərimli də ölmürmü belə şey üçün? İstənilən əmrə tabedir! İxtiyari tapşırığa farağatdır! Hər cür yaramazlıq eləməyə bir candır!
Odur ki, kimsə təəccüblənməsin. Təəssüflənsin, amma qətiyyən təəccüblənməsin. Nə gözləyiriksə o da olur. Əli Kərimli şərəfli bir iş görsə adam bax onda təəccüblənər ki, bundan nə əcəb? Deyilmi?! Vəssalam da. Demək ki, ortalıqda qeyri-adi nəsə yoxdur. AXCP sədri sadəcə öz ampluasına sadiqdir və elədikləri yaramazlıqlardan zövq alir.
Biz də öz ampluamıza sadiq qalaq və belə vətən xainlərini daim ifşa edək! " - deyə Partiya sədri fikirlərinə davam edib.
Xəbər 972 dəfə oxunub.
