Ramazan ayında restoranlarda vəziyyət necədir? Toy sifarişləri olurmu? Bəs iftar süfrəsi üçün sifarişlər necə?

Aktual.az  xəbər verir ki, Modern.az saytı bu sualla bir neçə restorana müraciət edib.

"Monte Kristo” şadlıq evinin meneceri İqbal Aydınoğlunun sözlərinə görə, Ramazanda heç bir yerdə toy olmur: "Hesab edirəm ki, Ramazan ayında heç bir yerdə toy olmamalıdır. Belə bir şeyin şahidi də olmamışam. Bizim restoranda da  toylar olmur.  İftar süfrəsi üçün müraciət edən ailəvi qonaqlarımız var. Tutaq ki, 10-20 nəfər yaxınları ilə gəlib iftarlarını burada açırlar. Biz iftar süfrəsində bir sıra şeyləri, məsələn, su, xurma, sup kimi qidaları kim olur-olsun, pulsuz veririk. Bundan başqa, kim əlavə nə sifariş edirsə, onu öz qiyməti ilə təqdim edirik. Bu, adambaşına 10 manat və ya daha çox ola bilər”.

 "Çanaqqala” restoranının administratoru Anar Əliyev bildirib ki, Ramazan ayında, ümumiyyətlə, toylar olmur: "Bu ayda, adətən, işlər zəif olur. Lakin çox nadir hallarda iftar süfrəsinin açılması ilə bağlı sifarişlərimiz olur. Belə olan halda qiymət müştərinin istəyindən asılı olaraq dəyişir. Konkret qiymət müəyyən etməmişik”.

"Oazis” restoranının administratoru Sehran Bəşirov da bu ayda toy sifarişinin olmadığını qeyd edib. Lakin restoranda iftar süfrələri açılır: "Toylar olmasa da, bizim restoranda iftar süfrələri açılır, şou proqramlar olur. İftar süfrələrində menyu standart deyil. Bu, adambaşına 40-50 manat da ola bilər, daha yüksək və ya aşağı qiymət də. Lakin su, xurma, sup kimi bəzi yeməklər restoran tərəfindən verilir. Qalan sifarişlər isə müştərinin istəyindən asılı olaraq dəyişir”.

"Niaqara” şadlıq evinin admisintratoru Yaşar Qasımovun sözlərinə görə, onlar da Ramazan ayında toylara yer vermirlər, çünki sifariş yoxdur: "Restoranımızda iftar süfrələri üçün sifarişlər olur. Ancaq bunun üçün standart qiymətlər müəyyən etməmişik. Hər kəs öz hesabından asılı olaraq sifarişlər edir. Məsələn, iftar süfrəsi üçün qiymət 30-35 manat da ola bilər, yaxud daha yüksək də”.

"Gilavar” restoranının administratoru Rufan Qasımov qeyd edib ki, Ramazan ayında nə toy, nə də iftar süfrəsi üçün sifarişləri var: "İftar süfrəsi üçün sifariş olarsa, qiymətlər müştəriyə görə dəyişə bilər. Daha doğrusu, süfrədə nə olmasından asılıdır. Bu, 5 manat, 10-15 manat və ya 100 manat da ola bilər. İftar süfrəsi qonaqlar üçün pulsuz da olur. Yəni əgər 150 nəfərlik iftar süfrəsi sifariş edilibsə, təbii ki, qonaqlardan pul tələb olunmur. Pulu sifariş edən müştəri əvvəlcədən verir”.

"Mega Palace” restoranının əməkdaşı Vüsal Şirinov bildirib ki, Ramazan ayında toy sifarişləri olmasa da, iftar süfrəsi üçün müraciət edənlər var: "İftar süfrələrinin məbləği menyudan asılıdır. Lakin biz Allah yolunda bu cür süfrələri ucuz edirik. Adətən, maya dəyərində olur. Buna baxmayaraq, qeyd etməliyəm ki, biz şadlıq sarayı kimi fəaliyyət göstərdiyimizə görə, iftar süfrəsi üçün sifarişlər də az olur. Bu cür sifarişləri, adətən, böyük restoranlar qəbul edir”.

"Yeganə” şadlıq sarayının mühasib köməkçisi Arzu  Abbasova bildirib ki, Ramazanda restoranda toy və ya hansısa tədbir olmur: "Bizim restoran tərəfindən bir gün iftar süfrəsi verilir. Lakin iftar üçün sifarişlər də olmur. Ramazan ayında işlər zəif gedir”.

 

Aktual.az