Azərbaycanda KOB subyektlərinin müəyyən edilməsi ilə bağlı yeni meyarların tətbiq edildiyi, eləcə də İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) fəaliyyətə başladığı 2018-ci ildən bəri ölkədə KOB subyektlərinin sayı 45 % artaraq 356 minə yaxınlaşıb.
Aktual.az xəbər verir ki, bunu KOBİA-nın İdarə Heyətinin sədri Orxan Məmmədov Bakıda keçirilən "Heydər Əliyev və Azərbaycan sahibkarlığı" adlı yerli şirkətlərin tanıtım sərgisində bildirib.
Onun sözlərinə görə, bu illərdə KOB-ların qeyri-neft ÜDM-də payı 23,5 %-dən 26,6 %-ə, qeyri-neft ixracında payı isə isə 23,3 %-dən 59,8 %-ə yüksəlib.
"Biz strateji fəaliyyət gündəliyimizi sahibkarlar ilə qarşılıqlı əlaqə şəklində, onların ehtiyac və inkişaf meyllərini öyrənməklə müəyyən edirik. Bu məqsədlə, həm daxili resurslar, həm də peşəkar şirkətlər cəlb olunmaqla mütəmadi sorğular keçirilir, sahibkarlardan daxil olan müraciətlər təhlil olunur, sahəvi görüşlər və dəyirmi masalar təşkil olunur. Əldə olunan məlumatlar və aparılmış təhlillər əsasında ötən dövrdə biznes subyektləri və sahibkarlığa başlamaq istəyən şəxslər üçün bir sıra dəstək mexanizmləri yaradılıb və istifadəyə verilib. Belə ki, daxili bazar araşdırması, təhsil, elm, tədqiqat və dəstək layihələrinin maliyyələşdirilməsi üzrə qrant proqramı, vergi güzəştlərini əhatə edən Startap şəhadətnaməsinin verilməsi, iri ticarət şəbəkələrinə çıxış və s. dəstək tədbirləri biznesin inkişafı üçün səmərəli mexanizmlərdir. Ölkəmizin 3 fərqli bölgəsində fəaliyyət göstərən KOB Evlərimiz "one-stop shop” formatında "G2B” və "B2B” xidmətlər göstərməkdədir", - deyə sədr qeyd edib.
"Bu ilin yanvar ayında Prezident İlham Əliyevin iştirakı ilə geniş funksional və texniki imkanlara malik Bakı KOB Evinin açılışı olub. Bu ölkə rəhbərliyinin sahibkarlığın inkişafına göstərdiyi diqqətin bariz nümunəsidir. Qarşıdakı dövrlərdə işğaldan zad olunmuş ərazilərimiz də daxil olmaqla digər regionlarda növbəti KOB evlərini sahibkarların istifadəsinə verməklə onların əhatə dairəsini genişləndirəcəyik. Hazırda 41 şəhər və rayonda fəaliyyət göstərən KOB dostları yeni sahibkarlıq subyektlərinin yaranmasına və mövcud KOB-ların inkişafına hərtərəfli dövlət dəstəyini yerində təmin edir. Bilik və bacarıqlara çıxışın təşviqi məqsədilə Bakıda və regionlarımızda KOB İnkişaf Mərkəzləri istifadəyə verilib. Bu mərkəzlərdə təlimlər, məsləhət və şəbəkələşmə üzrə xidmətlər ödənişsiz əsasda həyata keçirilir", - deyə O.Məmmədov əlavə edib.