Bakı-2015 I Avropa Oyunlarının taekvondo yarışları başa çatıb. Apasport.az saytının məlumatına görə, dörd gün ərzində 8 dəst medal öz sahibini tapıb.

Qeyri-rəsmi komanda hesabında Azərbaycan yığması yarışa qatılan bütün rəqiblərini qabaqlayaraq, Avropa Oyunlarının ən yaxşısı adına yiyələnib. Hesabında 3 qızıl, 1 gümüş və 1 bürünc olan taekvondo millimiz mükafat qazanan 13 ölkə arasında ən yaxşı nəticə göstərib. 

İkinci sırada Böyük Britaniya millisi qərarlaşıb. Onlar 3 medal qazansalar da, əyarına görə digər komandaları arxada qoyublar. Azərbaycan yığması ilə eyni sayda medal qazanan və 3 dəfə finalda üz-üzə gəlib, yalnız birində uduzduğumuz Rusiya siyahıda ilk “üçlüyü” qapayır. Ümumilikdə isə medal qazanan 13 ölkədən yalnız 5-i çempionluq sevinci yaşayıb.

Qeyd edək ki, taekvondoçularımızdan Ayxan Tağızadə (68 kq), Milad Beiqi Harçeqani (80 kq) və Radik İsayev (+80 kq) Avropa Oyunlarını çempion kimi başa vurublar. Yalnız finalda uduzan Fəridə Əzizova (67 kq) 2-ci yeri tutduğu halda, Patimat Abakarova (49 kq) “bürünc”lə kifayətlənib.

Aktual.az