Aktual.az xəbər verir ki, ötən il iyulun 28-də Sabunçu qəsəbəsi Natavan küçəsi 16 ünvanında qətl baş verib. Aralarında məişət zəmnində yaranmış mübahisə zamanı Fərman Eminov qonşusu Elməddin Əmənovu (1980-ci il təv.) bıçaqlayaraq, ağır yaralayıb. Zərərçəkən 3 saylı kliniki xəstəxanaya çatdırılsa da, onun həyatını xilas etmək mümkün olmayıb. 

Daxil olan məlumatla əlaqədar hadisə yeri ekspertlərin iştirakı ilə Sabunçu RPİ və prokurorluq əməkdaşları tərəfindən müayinə olunub. Şübhəli şəxsi 12-ci polis bölməsinin əməkdaşları saxlayıblar. 

İstintaqla müəyyən edilib ki, qonşular arasında narazılıq suya görə yaranıb. Belə ki, Elməddin Əmənov qonşuluqda yaşayan Fərman Eminovun həyətinə gedən su borusunu kəsib. Öz növbəsində suyun kəsildiyini görən sonuncu bundan hiddətlənərək, qonşusunu küçəyə çağırıb. Eminov Əmənova iradını bildirib, onun icazəsi olmadan nə səbəbdən suyu kəsdiyini soruşub. Nəticədə başlanan dava nəticəsində Fərman məişət təyinatlı bıçaqla Elməddini qəsdən həyatdan məhrum edib. Məlum olub ki, təqsirləndirilən şəxs 3, mərhum isə 2 uşaq atası olub. 

Hazırlıq iclasında təqsirləndirilən şəxsin anket məlumatları dəqiqləşdirilib, məhkəmənin tərkibi elan edilib. 

Məhkəmə baxışı fevralın 17-ə təyin edilib.