SOCAR Xəzərin Azərbaycan sektorunda Şimali Abşeron hövzəsindəki D230 blokunun potensial perspektiv strukturlarında geoloji-kəşfiyyat işlərinin aparılması üçün payızda BP ilə müqavilə imzalamağı planlaşdırır.

Aktual.az Trend-ə istinadən bildirir ki, bunu brifinqdə SOCAR prezidenti Rövnəq Abdullayev deyib.

Onun sözlərinə görə, həmin işlərə bu ilin sonunda başlamaq mümkün olacaq: "Hazırda D230 blokunda heç bir infrastruktur yoxdur, daha əvvəl bu ərazidə iş aparılmayıb".

Qeyd edək ki, ötən gün BP və SOCAR (Azərbaycan Respublikası Dövlət Neft Şirkəti) arasında Xəzər dənizinin Azərbaycan sektorunda Şimali Abşeron hövzəsindəki D230 blokunda potensial perspektiv strukturlarda birgə geoloji-kəşfiyyat işlərinin aparılmasına dair Anlaşma Memorandumu imzalanıb.