Ermənistan və Azərbaycan liderlərinin görüşündən sonra delimitasiya bəyanatı o deməkdir ki, hələ də rəsmi sərhəd yoxdur və bu, pisdir.
Aktual.az xəbər verir ki, bunu rusiyalı ermənipərəst tarixçi Modest Kolerov deyib.
"Rəsmi sərhəd yaradılmazdan, yəni demarkasiyadan əvvəl delimitasiya ilə bağlı uzun danışıqlar, yəni sərhədin xəritədə müəyyənləşdirilməsi danışıqları aparılmalıdır. Bu razılaşma ölkələr arasında sərhədin hətta xəritədə belə olmadığını göstərir. Delimitasiyaya dəvətin özü o deməkdir ki, bu sərhəd qoşunların gücü ilə istənilən istiqamətdə dəyişdirilə bilər. Heç bir delimitasiya olmasa, hər şey mümkündür. Delimitasiya sazişinin özü sərhədin olmadığının etirafıdır və bu tanımadan sonra İrəvan Azərbaycanı sərhədləri "pozduğuna” görə qınaya bilməyəcək”, - o bildirib.
Kolerov qeyd edib ki, İrəvan artıq Qarabağdan əl çəkib, Qarabağın erməni əhalisinin hüquqlarının təmin edilməsi məsələsi ilə bağlı Brüssel görüşündə irəliyə doğru bir addım da atılmayıb:
"Brüssel görüşü ilə bağlı rəsmi şərhlərin heç birində Qarabağ mövzusu qeyd olunmayıb. Hesab edirəm ki, İrəvan Qarabağ məsələsini gündəmdən çıxarıb, İrəvan üçün bu mövzu bağlıdır. Bəli, Rusiya pisdir, sülhməramlılar pisdir, bəs niyə Brüssel danışıqlarda Qarabağın müdafiəsinə qalxmadı? Sərhədinizi qorudularmı? Niyə Qərbə getdin? Nöqtə qoyulmayacaq, çünki kağız üzərində belə sərhəd yoxdur. Sərhədsiz sülh müqaviləsi boş bir ifadə olacaq.
İrəvanın Qarabağ probleminin həlli üçün mübarizəni dayandırması və diqqətini delimitasiyaya yönəltməsi faktı təsəlli olmamalıdır. Görünən odur ki, Azərbaycan Qarabağ problemini özü üçün həll edib. Əgər İrəvan Qarabağın statusu ilə bağlı həll edilməmiş problemdən danışsaydı, o zaman ən azı "blokada" məsələsi yaranardı. İndi o da getdi. Əgər yaxın vaxtlara qədər Ermənistanla Azərbaycan arasında münasibətlərdə əsas məsələ Qarabağ idisə, indi Qarabağ yox, delimitasiya məsələsidir. Qarabağ məsələsinin delimitasiya məsələsi ilə əvəzlənməsi fəlakətdir”.