Nərimanov Rayon Məhkəməsində "Azərbaycan Beynəlxalq Bankı" ASC-dən kredit götürərək qaytarmamaqda günahlandırılan daha 8 nəfər iş adamı barəsində seçilmiş həbs qəti imkan tədbirinin müddəti uzadılıb.
Aktual.az Report-a istinadən bildirir ki, həmin iş adamları barəsində həbs qəti imkan tədbirinin müddəti üç ay artırılıb.
Bununla da Beynəlxalq Bank işinə görə saxlanılan və barəsində seçilmiş həbs qəti imkan tədbirinin müddəti uzadılan iş adamlarının sayı 11 olub.
Qeyd edək ki, daha əvvəl "Azərbaycan Beynəlxalq Bankı" ASC-dən kredit götürərək qaytarmamaqda günahlandırılan "City Developer" MMC-nin direktoru Ratmir Bəkirov, "Azərbaycan Consaltinq Qrup" MMC-nin rəhbəri Erhan Cavad Yavuz və "Şəki İpək Aqro" MMC-nin icraçı direktoru Cavid Muxtarov barəsində də seçilmiş həbs qəti imkan tədbirinin müddəti üç ay artırılıb.
Xatırladaq ki, həmin şəxslər 2015-ci ilin may ayında saxlanılıb. Onlar barəsində Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə cinayət işi başlanıb. Bundan əvvəl də Nərimanov Rayon Məhkəməsinin qərarı ilə onlar barəsində seçilmiş həbs qəti imkan tədbirinin müddəti uzadılıb.
