Amerika Birləşmiş Ştatlarının Las Veqas şəhərində 2016-cı ildə Braziliyanın Rio-de Janeyro şəhərində keçiriləcək XXXI Yay Olimpiya Oyunlarına ilk lisenziyaların qazanıldığı güləş üzrə Dünya çempionatı davam edir.
Aktual.az Azərbaycan Güləş Federasiyasının saytına istinadən xəbər verir ki, ilk iki yarış gününün yekunlarına əsasən, güləşçilərimizdən Rövşən Bayramov (59 kq), Elvin Mürsəliyev (75 kq) və Sabah Şəriəti (130 kq) Olimpiya Oyunlarına vəsiqə əldə edib.
İkinci yarış günündə 59, 71, 80 və 130 kq çəki dərəcələrində qaliblər müəyyənləşib. Güləşçilərimiz günü 1 qızıl və 1 gümüş medalla başa vurub.
59 kq çəki dərəcəsində mübarizə aparan Olimpiya Oyunlarının ikiqat gümüş medalçısı və Dünya çempionu Rövşən Bayramov inamla güləşərək finala yüksəlib. Final yolunda güləşçimiz Hindistanlı Singh Ravinder üzərində asan, Şimali Koreyadan Von Çol Yun üzərində çətin qələbə qazanıb. 1/4 finalda London Yay Olimpiya Oyunlarının final görüşündə məğlub olduğu Hamid Mohammad Soryanla qarşılaşan Rövşən Bayramov vaxtından əvvəl görüşü qələbə ilə başa vurub. Buna səbəb, həm də İranlı güləşçinin görüş zamanı qaydalara zidd olaraq rəqibinə başla ardıcıl zərbələr endirməsi olub. Hakimlərin yekdil qərarı isə, Rövşən Bayramovu yarımfinala yüksəldib. Bu qələbə ilə güləşçimiz 2016-cı il Rio Olimpiadasına vəsiqəni də təmin edib. Yarımfinalda Rövşən Qırğızıstanlı Arsen Yeraliyevi mübarizədən kənarlaşdıraraq karyerasında üçüncü dəfə Dünya çempionatının finalına yüksəlib. Finalda güləşçimiz Kubalı rəqibi İsmael Borrero Molinaya uduzub və Dünya çempionatının gümüş medalına sahib olub.
İlk Avropa Oyunlarının qalibi və 71 kq çəkidə mübarizə aparan Rəsul Çunayev ötən mundialı bürünc medalla başa vurmuşdu. Bu dəfə güləşçimiz finala qədər yüksələ bilib. İlk olaraq Monakdon Frank Hassli üzərində qələbə qazanan Rəsul, ardınca Rusiya təmsilçisi Adam Kuraka heç bir şans verməyib. Yerli azarkeşlərin güclü dəstəyinə rəğmən ABŞ təmsilçisi Justin Daşaun Lesteri də tam üstünlüklə məğlub edən Rəsul yarımfinala yüksəlib. Finalın bir addımlığında Belarus güləşçisi Tsimur Berdiyevi də tam üstünlüklə məğlub edən Rəsul Çunayev adını finala yazdırıb. Finalda güləşçimiz Ukrayna təmsilçisi Armen Vardanyana qalib gələrək Dünya çempionatının qızıl medalına sahib olub. 
2016-cı il Rio Olimpiadasına daha bir vəsiqəni 130 kq çəkidə mübarizə aparan Sabah Şəriəti qazandırıb. İlk görüşündə Macarıstandan Balint Lam üzərində qələbə qazanan Sabah, 1/4 finalda Venesueladan Ervin Jose Caraballo Cabreranı mübarizədən kənarlaşdırıb. Yarımfinala yüksələn güləşçimiz həm də Rio Olimpiadasına 3-cü vəsiqəni əldə edib. Yarımfinalda Türkiyə təmsilçisi Rıza Kayaalpa məğlub olan Sabah Şəriəti bürünc medal şansını saxlayıb. Ancaq həlledici görüşdə Ukrayna Oleksandr Çernetskiyə məğlub olan güləşçimiz Dünya çempionatını beşinci sırada tamamlayıb.
59 kq
1/16 final - Rövşən Bayramov - Singh Ravinder (İND) 9:1
1/8 final - Rövşən Bayramov - Von Çol Yun (PRK) 8:7
1/4 final - Rövşən Bayramov - Hamid Mohammad Soryan (İRİ) 5:0
1/2 final - Arsen Yeraliyev (KGZ) - Rövşən Bayramov 0:4 (təmiz qələbə)
FİNAL - Rövşən Bayramov - İsmael Borrero Molina (CUB) 0:8
71 kq
1/16 final - Rəsul Çunayev - Frank Hassli (MON) 9:1
1/8 final - Rəsul Çunayev - Adam Kurak (RUS) 9:0
1/4 final - Rəsul Çunayev - Justin Daşaun Lester (USA) 8:0
1/2 final - Tsimur Berdiyev (BLR) - Rəsul Çunayev 0:8
FİNAL - Rəsul Çunayev - Armen Vardanyan (UKR) 6:4
80 kq
1/16 final - Rafiq Hüseynov - Yevgeni Saleyev (RUS) 3:8
130 kq
1/8 final - Sabah Şəriəti - Balint Lam (HUN) 3:1
1/4 final - Ervin Jose Caraballo Cabrera (VEN) - Sabah Şəriəti 0:9
1/2 final - Sabah Şəriəti - Rıza Kayaalp (TUR) 0:6
Bürünc medal görüşü - Oleksandr Çernetskiy (UKR) - Sabah Şəriəti 5:0
Məlumat üçün bildirək ki, Las Veqasda keçirilən Dünya çempionatında 2016-cı il Rio-de Janeyro Yay Olimpiya Oyunlarına ilk lisenziyalar qazanılır. Çempionatda yunan-Roma güləşi üzrə, 59, 66, 75, 85, 98 və 130 kq, qadın güləşi üzrə 48, 53, 58, 63, 69 və 75 kq, sərbəst güləş üzrə isə, 57, 65, 74, 86, 97 və 125 kq çəki dərəcələrində ilk 5 yeri tutan idmançılar Olimpiadaya birbaşa vəsiqə əldə edir.
