Aktual.az xəbər verir ki, 2015-ci ilin noyabrın 3-də Ramana qəsəbəsi, Şuşa şəhərciyində yaşayan Aynur Teymurova evində naməlum şəxslər tərəfindən bıçaqlanıb. O, yaxınlarının köməkliyi ilə 3 saylı kliniki xəstəxanaya çatdırılıb və həkimlərin səyi nəticəsində həyatı xilas edilib. Sabunçu RPİ Cinayət-axtarış şöbəsi və 12-ci polis bölməsi əməkdaşlarının keçirdikləri əməliyyat nəticəsində hadisəni törədən Ramana qəsəbə sakinləri Qulu Abdullayev və Kamran Cəfərzadə tutulublar. Araşdırma zamanı məlum olub ki, Cəfərzadə qadının oğlu ilə orta məktəbdə bir sinifdə oxuyub.

Bakı Ağır Cinayətlər Məhkəməsinin hökmü ilə təqsirləndirilən şəxslərin hər biri 10 il müddətinə azadlıqdan məhrum olunublar. 

Hökmdən məhkumlar apellyasiya şikayətləri verərək, cəzalarının azaldılmasını istəyiblər.

Bakı Apellyasiya Məhkəməsi onların şikayətlərini təmin etməyərək hökmü dəyişdirmədən qüvvəsində saxlayıb.