"Mövcud olan üçtərəfli mexanizmi liderlər səviyyəsinə çıxarmaq qərarına gəlmişik"

Bu il Türkiyə, Azərbaycan və Türkmənistan prezidentlərinin üçtərəfli görüşü keçiriləcək. APA-nın məlumatına görə, bu sözləri Türkiyə prezidenti Rəcəb Tayyib Ərdoğan Ankarada Türkmənistanın prezidenti Qurbanqulu Berdımuhammedovla görüşdən sonra keçirdiyi mətbuat konfransında deyib. O bildirib ki, ötən il Türkiyə, Azərbaycan və Türkmənistan xarici işlər nazirləri səviyyəsində üçtərəfli format təşkil olunub: “Nazirlər görüşərək bir sıra məsələləri, o cümlədən əməkdaşlıq layihələrini müzakirə edirlər. Bu mexanizmi liderlər səviyyəsinə çıxarmaq qərarına gəlmişik və bu il Türkmənistanda ilk toplantımızı keçirəcəyik".

R. T. Ərdoğan üç ölkə arasında  nəqliyyat və enerji sahəsində əməkdaşlıq əlaqələrinin qurulduğunu söyləyib: “Orta Asiyanın Xəzər dənizi vasitəsilə dünya bazarına çıxması baxımından Türkmənistan vacib mövqeyə malikdir. Görüşümüzdə Türkmənistan qazının Türkiyə vasitəsilə Avropa bazarına daşınması barədə fikir mübadiləsi apardıq. Bu sahədə başda Azərbaycan olmaqla, digər bölgə ölkələri ilə dialoq və əməkdaşlıq qururuq”.

Xatırladaq ki, Türkmənistanın prezidenti Qurbanqulu Berdimuhammedov Türkiyəyə rəsmi səfər edib. Səfər çərçivəsində iki ölkə arasında bır sıra sahələrdə əməkdaşlığa dair sənədlər imzalanıb.