Növbəti mövsümə hazırlıqlarını davam etdirən "Qəbələ" futbol klubu yeni transferə hazırlaşır. Məlumata görə, "Qırmızı-qaralar" "Kretey"dən hücumçu Baqali Dabo ilə anlaşıb.

Aktual.az AzNews.az-a istinadən xəbər verir ki, bu barədə Fransanın "LeQuipe" nəşri məlumat yayıb. Bildirilir ki, 27 yaşlı futbolçu bugünlərdə 2 illik müqaviləyə qol çəkəcək.

Hətta iddiaya görə, transfer üçün “Qəbələ” “Kretey”ə 40 min avro ödəməlidir.

Məsələ ilə bağlı “Qəbələ”nin baş meneceri Zaur Əzizovla əlaqə saxladıq. O, AzNews.az-a açıqlamasında konkret qərar verilmədiyi deyib: “Dabo transfer ehtimalı olan bir çox futbolçudan biridir. Qiymətinə gəldikdə isə, gərək anlaşma prosesi yekunlaşsın ki, qiymət də oxunsun”.

Qeyd edək ki, Dabo Fransanın "İstres" və "Kretey" klublarında çıxış edib. 2014-cü ildən "Kretey"in şərəfini qoruyan hücumçu "Loryan"ın yetirməsidir.

Xatırladaq ki, "Qəbələ" yay fasiləsində Nika Kvekveskiri, Filip Ozobiç və Teo Uiks Luisi transfer edib.