Aktual.az qafqazinfo-ya istinadən xəbər verir ki, M.Peskoviç “Neftçi”dən əvvəl Polşanın “Podbeskidze” klubunda çıxış edib. O, daha əvvəl isə “Nitra” (Slovakiya), “Poloniya” (Polşa), “Aris” (Yunanıstan), “Viborq” (Danimarka) klublarının şərəfini qoruyub.

 

Klubun qapıçılar üzrə məşqçisi Dmitri Kramarenko Mixal Peskoviçin transferi ilə bağlı fikirlərini bildirib: “Bildiyiniz kimi, qapıçı mövqeyinə axtarışlarımız davam edirdi. Təlim-məşq toplanışı dövründə də bir neçə namizədə baxmışdıq. Amma onların səviyyəsi bizi qane etməmişdi. Slovakiyalı Mixal Peskoviç təcrübəli qapıçıdır. Qapıçı üçün 33 yaş normaldır. Fikrimcə, o, komandaya kömək edə bilər. Aqil Məmmədov da getdikcə daha yaxşı forma yığır. Maksim Vayloya ümidlərimiz böyükdür. Sadəcə olaraq M.Vaylo gəncdir və onu əsas oyunlara birdən-birə buraxmaq doğru olmaz. İki təcrübəli qapıçının əhatəsində məşq etmək M.Vaylo üçün də faydalı olacaq. İstəyirik ki, qapıçılar arasında daha güclü rəqabət olsun. Çempionat uzun marafondur. Futbolda cəzalar və zədələr qaçınılmazdır. Bu baxımdan heyətdə üç qapıçının olması xeyrimizədir”.