İki gün əvvəl Abşeron rayon Fatmayı kəndində intihar hadisəsi baş verib.

Aktual.az AzNews.az-a istinadən xəbər verir ki, Mehman Nadirov adlı şəxs özünü yaşadığı həyətdəki ağacdan asıb. Əsasən ev və torpaq alqı-satqısıyla məşğul olan M.Nadirovun ölüm səbəbləri barədə dəqiq məlumat olmasa da, bir neçə maraqlı versiya var.

Yaxın çevrəsindən bildirilir ki, onun canına qəsd etməsi aldığı mənzilləri sata bilmədiyindən külli miqdarda borca düşməsiylə bağlı olub.

Başqa bir versiyaya görə isə o, son günlər gündəmi zəbt edən MTN-dəki hadisələrlə bağlı intihar edib. Belə ki, məlumata görə, mərhumun Milli Təhlükəsizlik Nazirliyinin Energetika və Nəqliyyat Sahələrində Təhlükəsizlik Baş İdarəsinin rəisi, general-mayor Akif Çovdarovla yaxın münasibətləri var imiş. Bildirilir ki, Çovdarovun Abşerondakı bütün istixanalarına məhz o nəzarət edirmiş. Çovdarovun istintaqa cəlb edildiyi və ona yaxın şəxslərin həbs olunduğu barədə məlumatlar yayılandan sonra M.Nadirov təşvişə düşüb. Belə bir vaxtda onun intihara əl atması da çox güman ki, həmin məsələlərlə bağlı olub.

Xəbərlə bağlı AzNews.az-ın əməkdaşı Abşeron Rayon Prokurorluğu və Abşeron Polis Şöbəsi ilə saxlayıb. Prokurorluqdan Mehman Nadirovun intihar etmə səbəbinin araşdırıldığı bildirilib: "Fatmayı kəndində yaşayan Mehman Nadirov noyabrın 10-dan 11-ə keçən gecə intihar edib. Fatmayı kəndində ev alqı-satqısı ilə məşğul olan Mehman Sadıqov yaşadığı ünvanda özünü asıb. Hazırda onun hansı səbəbdən özünü asması məsələsi araşdırılır. Ölüm faktı ilə bağlı artıq istintaq başlanılıb. Araşdırmalar yekunlaşdıqdan sonra ölüm səbəbi bilinəcək".

Abşeron Rayon Polis Şöbəsindən də Mehman Nadirovun hansı səbəbdən intihar etməsiylə bağlı məlumat verilməyib. Şöbədən ölüm səbəbinin araşdırıldığı və istintaqın hələ yekunlaşmadığı deyilib.