“Biri bıçağı çıxardıb, burnumu kəsəcəyini bildirdi”.

Bakı Ağır Cinayətlər Məhkəməsində Camal Eynullayevin CM-nin 181.2.1 (quldurluq, qabaqcadan əlbir olan bir qrup şəxs tərəfindən törədildikdə) və 181.2.5-ci (quldurluq, silah və ya silah qismində istifadə edilən əşyaları tətbiq etməklə törədildikdə) maddələri ilə təqsirləndirilməsinə dair cinayət işi üzrə məhkəmə prosesi yekunlaşıb. 

Ötən il sentyabrın 9-da Milli park ərazisində 4 nəfər vətəndaş Qabil Quliyevə hücum edib, onu bıçaqla hədələyərək üzərində olan 203 manat pulu ələ keçiriblər və sonra hadisə yerindən uzaqlaşıblar. Həmin gecə zərərçəkən Səbail RPİ 39-cu polis bölməsinə müraciət edərək, ona qarşı quldurluq edildiyini bildirib, hadisə ilə əlaqədar keçirilən operativ tədbirlər nəticəsində 2-3 saatdan sonra şübhəli şəxs qismində Camal Eynullayev və Əfqan Salmanov saxlanılıblar, onların üzərindən 2 ədəd mobil telefon və 1 ədəd bıçaq aşkar edilib. 

Məhkəmə prosesində Camal Eynullayev ittiham üzrə özünü qismən təqsirli hesab edib: 

“Rayona getmək istəyirdim. Bulvarda bir nəfərə yaxınlaşdım, yol pulu üçün ehtiyacım olduğunu bildirdim. O da pul vermədiyi üçün əsəbiləşdim və pul tələb etdim”.

Zərərçəkən Qabil Quliyevin sözlərinə görə, cinayətkar dəstənin üzvləri ona qarşı zor tətbiq edərək pulunu götürüblər:

“Dostlarımı yola salıb bulvarla qayıdanda 4 nəfər yaxınlaşıb dedilər ki, kömək edə bilərsən. Çıxardıb 3 manat verəndə pullarımı gördülər və hamısını istədilər. Sonra telefonumu tələb etdilər və biri bıçağı çıxardıb, burnumu kəsəcəyini bildirdi. Pulu zorla alıb qaçdılar. Mən əvvəl mühafizəni çağırdım və sonra polisə gəlib ərizəmi yazdım”.

Məhkəmənin hökmü ilə təqsirləndirilən şəxs 10 il müddətinə azadlıqdan məhrum etmə cəzasına məhkum olunub.\oxuaz

Aktual.az