Türkiyədəki hərbi çevriliş cəhdi zamanı küçələrə axışan və orduya qarşı olan əhali arasında ölkənin güləş üzrə milli komandası da yer alıb. 

Aktual.az aznews.az-a istinadən bildirir ki, idmançılardan biri 2 qat dünya, 3 qat Avropa çempionu, İlk Avropa Oyunlarının qalibi sərbəst güləşçi Taha Akgül də olub. Taha Akgül sosial şəbəkədə videosunu paylaşıb və belə rəy yazıb: "Bu millət vətən xainlərinə boyun əyməyəcək. Güləş milli komandası olaraq Boluda xalqımızla birlikdə millətimizin arxasındayıq və lazım olarsa, hər cür dəstəyə hazırıq".

T.Akgül küçədə çevrilişlə bağlı çıxışında bunları səsləndirib: "Biz indi sərbəst güləş yığması olaraq buradayıq. Bir az əvvəl təlim-məşq toplanışında idik. Ekranlardan bu hadisəni izlədikdə, təbii ki, bazada dayana bilmədik, meydanlara endik. Biz güləşçilər, pəhləvanlar olaraq millətimizin arxasındayıq. Ankaraya da gedəcəyik".