Lənkəranda oğurluq hadisəsi baş verib. 

Aktual.az-ın APA-ya istinadən verdiyi məlumata görə, rayonun Separadi kənd sakini, 1973-cü il təvəllüdlü Səbuhi Aftandil oğlu Əliyev Lənkəran Şəhər-Rayon Polis Şöbəsinə (ŞRPŞ) ərizə ilə müraciət edərək, ona məxsus ərzaq və təsərrüfat malları mağazasından ötən gecə oğurluq olunduğunu bildirib.

S. Əliyev bildirib ki, səhər saatlarında mağazaya gələrkən qapının sınmış, içərinin isə alt-üst olduğunu görüb. Naməlum şəxs və ya şəxslər mağazanın qapısının qıfılını dəmir alətlə sındıraraq içəridəki seyfdən 400 manat və müxtəlif növ ərzaq, təsərrüfat məhsullarını aparıblar. Həmçinin ticarət obyektinin pəncərəsinin şüşələri sındırılıb. Ümumilikdə mağaza sahibinə 2000 manatdan çox maddi ziyan dəyib.

Polis əməkdaşları hadisə yerinə gələrək, istintaq üçün zəruri olan barmaq izlərini qeydə alıblar.

Faktla bağlı Lənkəran ŞRPŞ-də cinayət işi açılıb, oğurluq faktının üstünün açılması istiqamətində tədbirlər davam etdirilir.

Aktual.az