Rusiya Ukraynanın hava hücumundan müdafiə sistemlərindən yan keçmək üçün "İsgəndər” və "Xəncər” raketlərini modernləşdirib. Qış ərəfəsində təkmilləşdirilmiş raketlər PUA istehsalı obyektlərinə və mühüm infrastruktura ciddi ziyan vurub.
Aktual.az xəbər verir ki, bu barədə "Faynənşl Tayms” məlumat yayıb.
"Aylardır dağıdıcı Rusiya hava hücumları Moskvanın Ukraynanın hava hücumundan müdafiə sistemlərindən yayınmaq üçün raketlərini dəyişdirməyə müvəffəq olduğunu göstərir. Bu yay Ukraynanın PUA istehsalçılarına qarşı bombardman kampaniyası Rusiyanın Amerika "Patriot” batareyalarına daha yaxşı müqavimət göstərmək üçün ballistik raketlərini necə təkmilləşdirdiyinin bariz nümunəsi idi. Hazırkı və keçmiş Ukrayna və Qərb rəsmiləri hesab edirlər ki, Rusiya 500 km-ə qədər uçuş məsafəsi olan raketlər buraxan İsgəndər-M mobil raket sistemini, eləcə də 480 km-ə qədər uça bilən "Xəncər” ballistik raketini çox güman ki, modifikasiya edib. Hazırda raketlər tipik trayektoriya üzrə hərəkət edir, sonra kursu dəyişir və "Patriot”ları çaşdıran və yayındıran manevrlər həyata keçirir”, - məlumatda deyilib.