“Günəşli” yatağının 10-cu platformasındakı yanğın güclü partlayışlarla müşayiət olunur.

Son məlumata görə, platformadakı neftçilərin təxliyə olunmasına başlanılıb. Neftçilər hər biri 10 nəfər tutumu olan rezin qayıqlara mindirilisə də onların platformadan aralanması mümkün deyil.

Qeyd edək ki, “28 may” Neft-Qaz Çıxarma İdarəsinə aid olan bu platforma SOCAR-a məxsusdur. Amma yatağın işlənməsi ilə BP şirkəti məşğul olur.

Yanğını əks etdirən fotoları təqdim edirik.

***
20:07

Bir neçə saat öncə “Günəşli” neft yatağında qaz sızması nəticəsində güclü yanğın başlayıb.

“Günəşli” yatağının yanan platformasındakı neftçiləri xilas etmək üçün ora yanğından mühafizə gəmisi göndərilib.

SOCAR-dakı mənbələrdən verilən məlumata görə, yanğın çox güclü olduğu üçün platforma ilə əlaqə tam kəsilib. Xilasetmə gəmisi platformaya yan ala bilmir. Platformada çalışan neftçilərin taleyindən heç bir xəbər yoxdur.

Əldə etdiyimiz son məlumata görə, platformada 84 neftçi var. Güclü külək xilasetmə işlərini çətinləşdirir.

Yanğınla əlaqədar SOCAR-ın vitse-prezidenti Rəhman Qurbanovun sədrliyi ilə komissiya yaradılıb.

Aktual.az