Aktual.az axşam.az-a istinadən verdiyi xəbərə görə, onun 1960-cı ildə verdiyi müsahibəsi yayılıb. "Marie Claire" dərgisində yer alan yazıda Monronun tam fərqli olduğu ortaya çıxıb. 

Şəxsi həyatı ilə bağlı ilk və son dəfə açıqlama verən Merilin bunları deyib:

"Mən valideynlərimdən ayrı yaşamışam. Anam doğma idi. Atam və ya atalarım haqqında deyilənlər isə doğrudur. Atam norveçli olub. Adı Mortenson imiş. Mən doğulan ərəfədə avtomobil qəzasında vəfat edib. Anam sonrakı əri Baykerin soyadını mənə verib. Anam montajçı işləyib. Psixoloji problemləri olub. Mən başqalarının yanında böyümüşəm. Gördüyüm ilk qadına ana, ilk kişiyə isə ata demişəm. Bir gün onlar mənim valideynim olmadıqlarını dedilər. Bu əsl şok idi. Anam hərdən uşaq evinə gəlir, mənə baş çəkirdi. Hündürboy idim. 9 yaşım olanda hamı elə bilirdi ki, 14 yaşındayam".

M.Monro heç vaxt yalan danışmadığını bildirib:

"Yaxın dostlarım yaxşı bilir ki, məni aldatmaq qeyri-mümkündür. Özüm də heç vaxt yalan danışmamışam. Bir dəfə məndən soruşdular ki, "Gecə yatanda nə geyinirsən?". Onlara lüt yatdığımı demək istəmirdim. Buna görə də "Chanel 5 geyinirəm" deyə, cavab verdim. Həqiqətəndə mən yatmazdan əvvəl üstümə bu ətirdən vururdum".