Fevralın 24-də Bakı Su İdman sarayında Gənclər və İdman Nazirliyi və Azərbaycan Üzgüçülük Federasiyasının birgə təşkilatçılığı ilə dövlət qurumları arasında üzgüçülük yarışı keçirilib.
Fövqəladə Hallar Nazirliyindən Aktual.az-a verilən məlumata görə, yarışda FHN-in qadın və kişilərdən ibarət komandası əzmkar mübarizə apararaq yüksək nəticələr əldə etməyi bacarıblar.
Belə ki, qadınlar arasında 50 metr məsafəyə üzgüçülük yarışında Bakı Regional Mərkəzinin əməkdaşı baş leytenant Leyla Əliyeva ikinci, Afaq Sultanova isə üçüncü yeri tutublar.
Qadınlar arasında estafet yarışlarında Fövqəladə Hallar Nazirliyinin komandası bütün rəqiblərinə qalib gələrək fəxri kürsünün ən yüksək pilləsinə qalxıb. Həmçinin, qarışıq estafet yarışında da FHN-in komandası qızıl medala layiq görülüb.
Kişilər arasında estafet yarışında isə FHN-in komandası gümüş medal qazanmağı bacarıb.