Dövlət Gənc Tamaşaçılar Teatrının aktyoru, əməkdar Artist Nofəl Vəliyev 18-23 avqust tarixlərində Türkiyənin Bursa şəhərinin Mudanya bölgəsində “Teatr tətili” yay məktəbində iştirak edib. 

Aktual.az axsam.az-a istinadən xəbər verir ki,  bu il yaradılan və Türkiyənin müxtəlif şəhərlərindən məşhur teatr mütəxəssislərinin qatıldığı məktəbdə aktyorumuz ustad dərsləri ilə çıxış edib. 

2014-2015-ci illər teatr mövsümü ərzində İstanbulda nümayiş etdirilən tamaşaların yozumu və aktyor oyununu qiymətləndirən Türkiyənin nüfuzlu  "XV Direklerarası Seyirci Ödülləri" qurumunun qərarı ilə adıçəkilən aktyorumuz iki nominasiya ilə də mükafatlandırılıb. 

“Ən yaxşı rejissor işi” nominasiyası üzrə mükafata aktyorun ötən mövsüm Türkiyə Cumhuriyyətinin Antaliya Böyükşəhər Bələdiyyə Teatrında Pərvin Ünalpın “Gec qalanlar” əsəri əsasında hazırladığı eyniadlı tamaşa layiq görülüb.  

“Türkiyə xaricində mükafata layiq görülən teatrlar” nominasiyası çərçivəsində növbəti mükafat isə cari ilin mayında Türkiyə Cumhuriyyəti Dənizli şəhərində keçirilmiş Beynəlxalq Teatr Festivalında nümayiş etdirilən “Qaçaq qocalar” tamaşasına verilib. 

Məlumat üçün bildirək ki, sözügedən tamaşa ötən mövsüm Azərbaycan Teatr Xadimləri İttifaqının nəzdində fəaliyyət göstərən “Rejissorluq emalatxanası”nda Nofəl Vəliyev tərəfindən hazırlanıb.