Aktual.az El TV-yə (Region TV) istinadən xəbər verir ki, 2015-ci ildə Mingəçevir şəhər Doğum Evində 2 min 380 nəfər uşaq dünyaya gəlib.

Doğulanlardan 1138 nəfəri qız, 1246 nəfəri isə oğlandır. Bunların içərisində 13 əkiz doğuş faktı qeydə alınıb. Doğum Evinin baş həkimi Zəhra Dumanova bildirir ki, bu il dünyaya gələnlər arasında qızların sayı oğlanlara nisbətən azlıq təşkil edib. Buna səbəb valideynlərin daha çox oğlan övlad istəməsi olub.

"Neçə illərdir ki, Azərbaycan əhalisinin sayında qadınların sayı kişilərin sayından üstün idi 51-49 faiz. Neçə illər bax, bu faiz saxlanılırdı. Ancaq, indi artıq əksinə 51 faiz kişilərdi, 49 faiz qadınlardır. Bu da yeni doğulmuş uşaqların, yəni oğlanların sayının artımı ilə əlaqədardır", - deyə baş həkim Zəhra Dumanova bildirib.

Zəhra Dumanovanın sözlərinə görə ilin əvvəlində doğum evlərinə dünyaya gələcək uşaqların cinsiyyəti barədə valideynlərə məlumat verilməməsi haqqında göstəriş verilib.

"Milli Məclis gözəl qərar qəbul elədi ki, ulturasəs müayinəsi aparatı ilə uşağın cinsiyyəti haqqında valideynə məlumat verilməsin. Bəli, bu da əsas götürüldü. Bundan sonra demək o olmaz ki, demək ki qadındı, ya kişi cinsindəndir", - deyə baş həkim qeyd edib. Bildirək ki, ötən ilin eyni dövründə doğum evində 2 min 387 doğuş faktı qeydə alınıb ki, onlardan da 1141-i qız, 1285-i oğlan olub.