Oxot dənizində “Dalni Vostok” (“Uzaq Şərq”) balıq ovlayan gəmisinin qəzaya uğraması nəticəsində 54 nəfər ölüb, 63 balıqçı xilas olunub, 15 nəfər isə itkin düşüb.

APA-nın “RİA Novosti”yə istinadən verdiyi xəbərə görə, bu barədə Rusiya FHN-in Kamçatka üzrə İdarəsinin nümayəndəsi bildirib.  

“Balıq ovlayan gəmilər tərəfindən 63 nəfər sudan sağ çıxarılıb. Hadisə yerində 26 gəmi var”, deyə mənbə bildirib.  

Qeyd edək ki, “Dalni Vostok” gəmisi aprelin 2-nə keçən gecə Oxot dənizi akvatoriyasında batıb. İlkin məlumata görə, gəminin göyərtəsində 132 nəfər – 78 rusiyalı və 54 əcnəbi olub. Dəqiqləşdirilmiş məlumata əsasən, əcnəbilərdən 42-si Birma, üçü Latviya, dördü Ukrayna və beşi Vanuatu vətəndaşı olub.  

Kamçatka Dənizdə Xilasetmə Mərkəzindən bildirilib ki, gəmi qəzaya uğrayan zaman ekipaj üzvlərinin hamısı xilasedici canlıq və termokostyumda olublar.  

Məlumata görə, gəmi Maqadandan 300 km aralıda batıb.