Beynəlxalq Bankla bağlı tutulanların həbs müddəti uzadıldıAzərbaycan Beynəlxalq Bankı ilə bağlı başlanılan cinayət işi üzrə saxlanılan şəxslərin həbs müddətinin uzadılmasına başlanılıb.
Aktual.az Apa-ya istinadən xəbər verir ki, vəkil Kamandar Nəsibovun verdiyi məlumata görə, Nərimanov Rayon Məhkəməsinin qərarı ilə bir neçə nəfərin barəsində seçilmiş həbs qətimkan tədbirinin müddəti bu gün uzadılıb: “Növbəti günlərdə digər təqsirləndirilən şəxslərin də barələrində seçilmiş həbs qətimkan tədbirinin müddətinin uzadılmasına baxılacaq. Bu gündən artıq prosesə başlanılıb”.
Qeyd edək ki, Azərbaycan Beynəlxalq Bankı ilə bağlı Cinayət Məcəlləsinin 178-ci (dələduzluq) və digər maddələrinə əsasən cinayət işi başlanılıb. Bankdan yüksək məbləğdə kredit götürərək vəsaitləri qaytarmayan bankın sabiq məsul vəzifəli əməkdaşları və iş adamları - Beynəlxalq Bankın Mərkəzi filialının direktoru olmuş İlqar Abdullayev, Beynəlxalq Bankın Nəqliyyat filialının direktoru vəzifəsində işləmiş Kənan Orucov, Azərbaycan Beynəlxalq Bankın Dubay filialının müdiri Adil Hüseynov, Beynəlxalq Bankın inzibati binalarının mühafizəsini həyata keçirən “İnter Security” MMC-nin baş direktoru İbrahim Hüseynov, “Azərinşaatservis” MMC-nin Müşahidə Şurasının sədri Arif Həsənov, “Azərinşaatservis” MMC-nin təsisçisi olduğu “Trek İnvest” SC-nin direktor əvəzi Əli Əlişov və “İnter Glass” ASC-nin direktoru Fariz Muradov və digər bir neçə nəfər həbs olunub.
Bundan əlavə bankın sabiq rəhbəri Cahangir Hacıyev də istintaqa cəlb olunub. O, iş üzrə bir neçə dəfə ifadə verib.
Hazırda cinayət işi üzrə istintaq hərəkətləri davam etdirilir.
