2 qızı ilə birlikdə İŞİD üzvlərinə qoşularaq Suriyaya qaçmış Pərvanə Yusifovanın həyat yoldaşı İlqar Yusifovun həyatı təhlükədədir.

Aktual.az aznews.az-a istinadən bildirir ki, bu barədə məlumat verən İ.Yusifov evinə hücum olunduğunu deyib. Onun sözlərinə görə, məsələ ilə bağlı "102 xidmət"inə zəng edib və Abşeron Rayon Polis İdarəsinə şikayət edib.

Bu ərəfədə uzun müddətdir ki, səs-soraqları kəsilmiş ailə üzvləri İlqarla əlaqə saxlayıblar. Qızları Nəzrin və Lalə "Whatsapp" vasitəsilə atalarına mesaj yazaraq, Rakkada olduqlarını deyiblər. Qızlar anaları Pərvanənin də onu Suriyaya çağırdığını bildiriblər. Onlar atalarını islamı qəbul edib yanlarına getməyə səsləyiblər.

İ.Yusifov isə bunun ona qarşı qurulmuş tələ olduğunu düşünür: "Hesab edirəm ki, bu məlumatların yayılmasını istəməyən qüvvələr məni aradan götürmək üçün Azərbaycandan çıxarmağa çalışırlar. İstəyirlər ki, sərhəddən çıxan kimi məni öldürsünlər və beləcə bu işin üstünün açılmasına mane olsunlar. Mən bilirəm ki, Azərbaycanda həmin qüvvələrin havadarları var. İstəyirəm ki, onlar aşkarlansın, ailəm geri qayıtsın. Qayıtmasa belə, heç olmazsa başqa ailələr bədbəxt olmasın".