"Azərsun Holdinq” Şirkətlər Qrupuna məxsus Azərbaycan Şəkər İstehsalat Birliyi MMC gömrük qaydaları əleyhinə olan inzibati xətaya görə cərimələnib.
Aktual.az xəbər verir ki, Dövlət Gömrük Komitəsi tərəfindən şirkət barəsində İnzibati Xətalar Məcəlləsinin 485.2-ci (Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə) maddəsinə əsasən cərimə protokolu tərtib edilib.
Daha sonra protokol baxılması üçün Nizami Rayon Məhkəməsinə göndərilib. Məhkəmədə barəsində protokol tətbiq edilmiş MMC ilə bağlı müraciətə baxılıb.
Hakim Nəriman Mehdiyevin sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib.
Qeyd edək ki, gömrük qaydaları əleyhinə olan inzibati xətaya görə vəzifəli şəxslər 1000 manat məbləğində, hüquqi şəxslər 1500 manat məbləğində cərimə edilir.
Xatırladaq ki, "Azərbaycan Şəkər İstehsalat Birliyi” MMC 2001-ci ildə təsis edilib və 128.6 mln. manat nizamnamə kapitalı var. MMC tanınmış iş adamı Abdulbari Gözəlin rəhbəri olduğu "Azərsun Holdinq”in törəmə şirkətidir.
"Azərbaycan Şəkər İstehsalat Birliyi” nin qanuni təmsilçisi Məhəmməd Əli Mahmudidir.