Aktual.az  apasport.az-a istinadən xəbər verir ki, yarışda çıxış edən 28 komanda 7 qrupda mübarizə aparıb.

Yer aldığı B qrupunda bütün oyunlarda qələbə qazanan Azərbaycan millisi mərhələni bir neçə rekordla başa vurub.

Belə ki, yığmamız seçmə oyunlarda 100 faizlik nəticə göstərən 5 komandadan biri olub. Biro Jadenin baş məşqçisi olduğu millimiz Ukrayna, Portuqaliya, Qazaxıstan və Rusiya ilə birlikdə mütləq rekorda imza atıb. Onların hamısı 3 oyunda 9 xal toplayıb.

Millimizin daha bir rekordu məhsuldarlıqda qeydə alınıb. Bosniya və Herseqovinanı 5:4, Albaniyanı 5:0, Macarıstanı 6:1 hesabı ilə yenən komandamız mərhələni 16 qolla bitirib. Bununla da millimiz Avropanın ən məhsuldar komandası adını qazanıb. İspaniya 14 qolla 2-ci olubsa, Çexiya ilə Bosniya və Herseqovina hərəyə 12 dəfə fərqlənib.

Ümumiyyətlə Bakıdakı B qrupu mərhələnin ən məhsuldar matçlarına meydan olub. Bakı İdman Sarayında keçirilən 6 görüşdə 44 qol vurulub. Bu da AVRO-2018-in bu mərhələsində rekorddu. Orta məhsuldarlıq

7,33-ə bərabər olub.

Təəssüf ki, 16 qol vuran komandamız müdafiə xətti və qapıçısı ilə öyünə bilməz. 5 top buraxan milli bu göstəricidə 8-ci olub. Müqayisə üçün qeyd edək ki, Qazaxıstanla Rusiya ümumiyyətlə qol buraxmayıb.

Yığmamız top fərqində 2-ci yerə şərik olub. İspaniya +13-ə imza atıbsa, millimizlə Qazaxıstanda bu rəqəm +11-ə bərabərdi.

 

Aktual.az