Bu ilin oktyabr ayında Avropa İttifaqının Azərbaycanla strateji tərəfdaşlıq barədə danışıqlara başlamaq üçün mandat verəcəyi gözlənilir.
Aktual.az AzVision.az-a istinadən xəbər verir ki, bu barədə xarici işlər nazirinin müavini Mahmud Məmmədquliyev Mobillik naminə Tərəfdaşlıq üzrə beynəlxalq konfransda bildirib.
Nazir müavini, Aİ-nin keçən il Riqada keçirilən sammitində Azərbaycanla strateji əməkdaşlığa dair saziş layihəsinin təqdim olunduğunu xatırladıb.
O bu sazişin imzalanmasının Azərbaycan-Avropa İttifaqı əməkdaşlığının səviyyəsini artırmağa imkan verəcəyini vurğulayıb.
Nazir müavini, həmçinin ilin ikinci yarısında Aİ-də Azərbaycan üzrə Alt Komitələrin iclasının keçirilməsinin planlaşdırıldığını bildirib: "Biz, həmçinin aviasiya sahəsində Aİ ilə saziş üzrə danışıqları davam etdirməyi planlaşdırırıq".
