Məlumata görə, Konsulluğa ünvanlanmış memorandumda spiker C.Souki təəssüflə bildirir ki, Nümayəndələr Palatasının xarici siyasətlə bağlı qəbul etdiyi hər bir sənəd müvafiq komitələrə getməli olduğu halda, sözügedən H.R. 167 saylı qətnamə mövcud qanunvericilik prosedurlarına zidd olaraq gündəliyə salınıb və ictimai müzakirəyə çıxarılmadan qəbul olunub.

 

Qeyd olunur ki, Havay Ştatının Nümayəndələr Palatasında bəzən fərdlərə və təşkilatlara, məsələn, müəllimlərə, səhiyyə işçilərinə, yaxud, xeyriyyə qurumlarına həvəsləndirici məqsədlərlə təbriknamələr təqdim olunur. Spiker C.Souki qeyd edir ki, H.R. 167 saylı qətnamə də bu qəbildən sadə mərasim xarakterli sənəd adı altında gündəliyə salınıb və onun əsl mahiyyətinə diqqət yetirilməyib. Bu səbəbdən də, spiker C.Souki sözügedən qətnamənənin müvaifq komitə tərəfindən müzakirə olunmadan qəbul edildiyinə görə dərindən üzr istədiyini bildirərək, oxşar hadisələrin gələcəkdə baş verməməsi üçün daxili qaydaları dəyişəcəyini vurğulayır.

Həmçinin, spiker bildirir ki, ABŞ uzun illərdir Ermənistan-Azərbaycan münaqişəsinin həlli ilə bağlı səylər göstərir. Bu səpkidə spiker C.Souki, H.R.167 saylı qətnamənin hər hansı bir hüquqi qüvvəyə malik olmadığını vurğulayaraq, Nümayəndələr Palatasının dolğun məlumat əldə etmədən belə bir sənədi qəbul etməsinə görə üzrxahlıq edir.

 

Sipker C.Souki memorandumun sonunda Nümayəndələr Palatasının üzvləri adından, Azərbaycan və ABŞ arasındakı güclü dostluq əlaqələrinin inkişaf etməkdə davam edəcəyinə ümid etdiklərini bildirərək yazır: “Ümid edirəm ki, bizi bu vəziyyətə gətirib çıxardan xoşagəlməz halı anlayırsınız. Buna görə, mən Azərbaycan Höküməti və xalqından səmimi şəkildə üzr istəyirəm”.

 

Qeyd edək ki, sözügedən qətnamədən bir müddət əvvəl – 2016-cı ilin 10 mart tarixində erməni lobbisinin təhrikilə Havay Ştat Senatında oxşar məzmunlu iki qətnamə gündəliyə gətirilmişdi. Azərbaycanın Los Ancelesdəki Baş Konsulluğunun operativ müdaxiləsi nəticəsində Havay Senatının rəhbərliyi 11 mart tarixində rəsmi bəyanat verərək, bu qətnamələri rədd etdiyini elan etmişdi. Üstəlik, həmin bəyanatda Azərbaycanın ərazi bütövlüyünə açıq dəstək ifadə olunmuşdu. Görünür, bundan pərt olan erməni lobbisi növbəti məkrli planını Havay ştatının Nümayəndələr Palatasında həyata keçirməyə cəhd edib, qanunvericiləri aldadaraq öz məqsədlərinə nail olmağa çalışıb. Ancaq Palatanın spikeri tərəfindən imzalanmış və sözügedən qətnaməni heçə endirən rəsmi memorandum ilə erməni lobbisi öz layiqli cavabını bir daha alıb.