Dünyanın siyasi palitrasında bəs-bəlli görünən əsas çalar budur: Amerika hamıya Ukraynanın taleyini yaşatmaq, başqa dövlətlərin və xalqların bədbəxtliyi üzərində öz səltənətini qurmaq, kimlərinsə çiyninə, boynuna çıxıb yekə görünmək niyyətindədir. Hər halda belə olmasaydı, bu fövqəldövlət çox yox, bircə faydalı layihəyə imza atar, dünya demokratiyasına azacıq da olsa töhfə verər, insanların qanı üzərindən siyasət yürütməzdi.

İndi də nişangahı biz tərəfə tuşlayıblar. Öz aləmlərində Azərbaycanı hədəfə alıblar. Ard-arda həmlələr edirlər. Üstəlik, bu həmlələri o qədər diletant, naşı, kustar formada edirlər ki, heyrətə gəlməyə bilmirsən.

Paşinyan Rusiyanı açıqca "baqaj”a qoyub, tamamən Qərbə yönəlib. Və Amerikanın istəyi budur ki, biz də Ermənistan kimi davranaq, "Soros”un missioneri kimi bəyanatlar verək. Fəqət, mümkünmü, belə bir icraat? Təbii, mümkün deyil. Çünki, Azərbaycan bütün məsələlərdə ilk öncə öz milli maraqlarını nəzərə alır, qarşısındakı ilə onun niyyətinə görə davranır və ən nəhayət: heç kimin vassalı, əlaltısı, buyruq qulu olmağı düşünmür!

Paşinyanın isə indiki məqamda itirəcəyi heç nə yoxdur. Zatən məğlubdur. Bütün daxili və xarici dayaqlarını itirib. Ölkəsini xaos durumuna gətirib. Hakimiyyətdə uzun müddət qalmayacağını da dəqiq bilir. Və belə bir vəziyyətdə heç şübhəsiz o, bütün kartlarını ortalığa çıxaracaq, hamıya qarmaq atacaq, əlinə keçən bütün saman çöplərindən yapışacaq. Amma məsələ burasındadır ki, söhbət Amerikadan gedir. Riyakar və xəyanətkar Amerikadan! Hamının arxasında dağ kimi deyil, dərə kimi dayanan Amerikadan! Paşinyanı da başqaları kimi öz növbəti qurbanına çevirəcək Amerikadan!