Bu gün Milli Məclisin yaz sessiyasının növbəti plenar iclası keçiriləcək.

Aktual.az AzVision.az-a istinadən xəbər verir ki, iclasın gündəliyə 7 məsələnin müzakirəsi daxil edilib.

İclasda "Bələdiyyələrin fəaliyyətinə inzibati nəzarəti həyata keçirən orqanın illik məruzəsi haqqında" sənədə, "Azərbaycan Respublikası Prezidenti və Belarus Respublikası Prezidentinin birgə bəyannaməsinin təsdiq edilməsi haqqında" qanun layihəsinə, eləcə də "Azərbaycan Respublikası ilə Belarus Respublikası arasında 2025-ci ilədək sosial-iqtisadi əməkdaşlıq haqqında" müqavilənin və onun proqramının təsdiq edilməsi barədə qanun layihəsinə baxılacaq.

Həmçinin iclasın gündəliyində "Avtomobil nəqliyyatı haqqında" qanuna dəyişikliklər edilməsi və "Bələdiyyələrin əraziləri və torpaqları haqqında" qanuna əlavə edilən "Azərbaycan Respublikasında bələdiyyələrin siyahısında dəyişiklik edilməsi barədə" qanun layihəsinə baxılması da daxil edilib. "Lisenziyalar və icazələr haqqında" qanun layihəsi də ikinci oxunuşda müzakirəyə çıxarılacaq.

Eyni zamanda plenar iclasda "Antidempinq, kompensasiya və mühafizə tədbirləri haqqında" yeni qanun layihəsi birinci oxunuşda müzakirə ediləcək.