"Sən bitmiş adamsan!"- Deputatdan Əli Kərimliyə sillə kimi sözlər


Elşən Musayev: "Öhdəlik götürdükləri hansısa qüvvənin maraqlarını açıqca ifadə edirlər”

Bakı Şəhər İcra Hakimiyyəti (BŞİH) Milli Şuranın mitinqlə bağlı müraciətinə  cavab verib. Mitinqin oktyabrın 19-da saat 15:00-dan 17:00-dək Lökbatan qəsəbəsi, 28 may küçəsi "Neftçi İdman Klubu”nun Qaradağ təlim-idman bazasında keçirilməsinə razılıq verilib.
Milli Şura isə 28 sentyabr mitinqi kimi, bu dəfə də icazə verilən məkanla razılaşmır. Bu barədə modern.az-a danışan Milli Şuranın üzvü Tofiq Yaqublu bildirib ki, mitinq iştirakçıları Lökbatana getməyəcək. O, qeyd edib ki, oktyabrın 19-da saat 15:00-da metronun "28 May” stansiyasının çıxışındakı meydanda mitinq keçirəcəklər.
AXCP sədri, Milli Şuranın Koordinasiya Şurasının üzvü Əli Kərimli də feysbuq səhifəsində paylaşdığı statusda "28 May” metro stansiyasının qarşısında aksiya keçirəcəklərini qəti şəkildə bəyan edib.
Milli Şuranın oktyabrın 19-na təyin etdiyi mitinqlə bağlı təşkilatçılar Bakı Şəhər Baş Polis İdarəsinə (BŞBPİ) çağırılıb.
Bu barədə APA-ya mitinq təşkilatçılarından olan Tofiq Yaqublu məlumat verib. O bildirib ki, BŞBPİ-dən onlara zəng edərək, oktyabrın 17-də saat 11:00-a idarəyə dəvət ediliblər.
Milli Şuranın ardıcıl iki dəfə Lökbatanda icazəli mitinq keçirməkdən imtina etməsi, qarşıdurmaya cəhd göstərməsi müzakirələrə səbəb olub. Belə fikirlər var ki, ölkə daxilində müəyyən gərginlik yaratmaq üçün bu cür yollara əl atılır. 8 oktyabrdakı piket edə buna bariz sübut kimi önə çəkilir.
Daha öncədən xaricdəki bir sıra mühacirlərin payızda "inqilab” olacağına dair çağırışlar etməsi fonunda vətəndaşları narahat edən odur ki, Kərimlinin qarşıdurma planı ölkə daxilində çaxnaşmalar yarada bilər.
Demokratik Maarifçilik Partiyasının sədri, deputat Elşən Musayev Milli Şuranın məqsədinin tam aydın şəkildə göründüyünü qeyd etdi: "Milli Şuranın aksiya kontekstində tək məqsədi təxribatdır. Başqa təsbit, görüntü yoxdur. Dediyimi sosial şəbəkələrdəki çağırışlardan da, rabitəsiz çıxışlardan da, bir az el dilində desək radikal müxalifətin qırımından da görmək olar. Bakı Şəhər İcra Hakimiyyətinin ”Lökbatan razılığı"ndan sonra radikalçıların, konkret olaraq Əli Kərimlinin feysbuq üzərindən verdiyi bəyanat da o məntiqin ifadəsidir ki, icazəli və ya icazəsiz, fərq eləmir, mahiyyət dəyişmir. Bunlar əgər piketlə yürüşün, yürüşlə mitinqin fərqini, təyinatını, təsnifatını ayırd edə bilmirlərsə, nə planlasalar, hansı icraatı reallaşdırsalar və ya reallaşdırmaq istəsələr, yenə eyni marağa xidmət edəcəklər. Necə ki, edirlər. Maraq və istəksə təxribatdır. Biz bu ssenarinin ilkin rüşeymlərini 8 oktyabr piketindən sonra növbəti dəfə sezdik. Həm də bütün çılpaq ayrıntılarla bərabər sezdik. Məram və konstitusion qayda qaldı bir kənarda, ancaq xaos yaratmaq, video çəkib imitasiya eləmək, özlərinin yazıq obrazını cəmiyyətə sırımaq xətti ön plana keçdi. Buna səbəb odur ki, Əli Kərimli bitmiş adamdır, itirəcəyi heç nə yoxdur, nə özü, nə də siyasət adına. Ona görə xalqı qarşıdurmaya çağırır, tarana gedir. Amma hər zaman olduğu kimi yenə keyfiyyətsizcə, ucuzca, bərbadca, lüzumsuzca gedir. Onunku xalq dərdi deyil, şəxsi qisasdır. O, heç zaman nə milləti düşünüb, nə Qarabağı, nə də siyasi düşərgəni. Tək amalı pislik eləmək, ürək bulandırmaq və qarışıqlıq yaratmaqdır. Mitinqə rəsmi icazənin verilib-verilməyəcəyinin heç nəyi dəyişməyəcəyini öncədən söyləmişdik, proqnozlaşdırmışdıq. Dediyimiz də oldu.

Yəni əvvəldən bilirdik, təxmin edirdik ki, güzəşt olsa da, icazə verilsə də, proses təxribat tərəfə sürüklənəcək, güzəşt olmasa da. Çünki 3 fərqli məkan olaraq elə yerlər istənilmişdi ki, orada mitinq keçirmək faktiki olaraq şəhərin mərkəzini, paytaxtın həyatını iflic vəziyyətinə sala bilərdi. Elə Milli Şuranın məqsədi də o idi ki, qarışıqlıq yaransın, siravi vətəndaşlarla mitinq iştirakçılarını ayırd etmək mümkün olmasın, axırda da Əli Kərimli ətrafda görünən hamını öz adına çıxıb desin ki, sayımız minlərlədir. Adi bir misal çəkim. Matəm günlərində bilirsiniz ki, Şəhidlər Xiyabanını nə qədər insan ziyarət edir. Əli Kərimli belə məqamlarda hər zaman hansısa dəstənin önündə durur və dərhal şəkil çəkdirir. Guya arxadakılar hamısı cəbhəçidir. Amma onlar siravi, siyasətə aidiyyəti olmayan adamlardır, xalqdır, hər zaman ziyarətə gələnlərdir. Ayrıca, bu taktika hər yerdə, hər imkanda yeridilir. Əsas da mitinqlərdə və digər aksiyalarda. Görün məkan olaraq haralar seçilib, "28 May” metro stansiyası tərəf, Nəriman Nərimanov və Tofiq Bəhramov adına stadionun qarşısı. Hər üç məkana heç normalda güclə gedib çatırıq. Çünki oralarda daim tıxac olur. O zaman sual edirəm: Belə bir məkanda mitinq keçirilsə, nə baş verər? Bu məqamda siravi aksiya iştirakçısı ilə yoldan keçən birini ayırd eləmək mümkündürmü? Ümumən orada ağız deyəni qulaq eşidərmi? Orada effektli mitinq keçirmək realdırmı? Yox, təbii. Ona görə deyirəm ki, məqsəd tamam başqadır, ölkəni qarışdırmaqdır, çox kütlə olan yerdə say qabartmaqdır, xaricdəki hamilərə daha "məzmunlu” hesabat verməkdir".
Deputat gələn ayla bağlı yayılan şayiələrə də münasibət sərgilədi: ""Noyabr təlatümü” haqda mifi, əsatiri də Əli Kərimli özü yaradıb. Bu, təxminən bir zamanlar dünyanın filan gün sonu gələcək söhbətinə bənzər bir şeydir. Təbii, inqilab, xaos radikal müxalifətin arzusu, xəyalıdır. Fəqət, bu arzu Azərbaycanda gerçəkləşməyəcək. Bir o məqamla razıyam ki, radikal müxalifətçilər planlı gedirlər, öhdəlik götürdükləri hansısa qüvvənin maraqlarını açıqca ifadə edirlər, antimilli hərəkətlərini sistemli şəkildə həyata keçirirlər. Amma Azərbaycan yiyəsiz deyil, bu ölkənin prezidenti də yerindədir, polisi də, siyasi rəhbərliyi də, dövlətçilik üçün sinəsini önə verən, ən kəskin situasiyalarda həmin dövləti qorumağa hazır və qadır olan vətəndaşı da. Əli Kərimlinin fikri, deyəsən, 30 il öncəyə gedib. O dövrlərə ki, 5 dəqiqəlik çıxışla ictimai rəyi dəyişmək mümkün idi. İndi isə elə deyil, xalq siyasi cəhətdən yetərincə maariflənib, hər şeyi ayırd edə, yaxşını pisdən seçə bilir. Artıq Azərbaycanın siyasi elitasında naşılara, gədə-güdələrə yer yoxdur və olmayacaq! İlham Əliyevi, son dövrlərdə adını ən yüksək mərtəbələrə, siyahılara yazdırmış Azərbaycanı qorumaq lazımdır. Allah eləməsin, Əli Kərimli kimi adam dövlət başçısı olsa, yarım saatlıq belə müddətdə nə vətəndaş qürurunu daşıya bilərik, nə dövlətin qoruyucu funksiyasını görərik, nə də rahat və xoşbəxt olarıq". //"Yeni Müsavat”
 
 
Aktual.az
Xəbər 753 dəfə oxunub.

YAZARLARIMIZ

SEÇİLMİŞ

SON XƏBƏRLƏR