Bölgələrdə istirahət neçəyə başa gəlir?

Bölgələrdə istirahət neçəyə başa gəlir?

Hazırda pandemiya dövrü olduğundan bir çox xarici ölkələrə gediş-gəlişin bərpası mümkün deyil. Sərhədlərini turistlərə açan ölkələrdə isə COVID-19 pasportunun tələbləri ilə bağlı müəyyən şərtlər var.

Vəziyyət belə olan halda insanlar səyahət üçün xarici ölkələrdən daha çox bölgələrə üz tuturlar. Bu halda səyahətsevərləri yerli turizm obyektlərinin qiymətləri maraqlandırır.

Bəs bölgələrə axın edənlər istirahət üçün nə qədər pulundan keçməlidir?

Mütəxəssislərin sözlərinə görə, hazırda ölkədə pandemiya hökm sürdüyündən yerli turizm obyektlərində 15-20% qiymət artımı var.

Bu haqda BAKU.WS-ə açıqlama verən turizm eksperti Rəhman Quliyev artımın səbəbini otellərdə və turizm obyektlərində həyata keçirilən izolyasiya və müəyyən sosial məsafə qaydalarının tətbiqi ilə əlaqələndirir:

"Hazırda dünyada baş verən bahalaşma ölkəmizə də təsir edib. Bölgələrdəki otellərin uzun müddət qapalı qalması, fəaliyyətində durğunluq yaranması qiymətlərin artmasına səbəb olub.

Bununla yanaşı, yerli otellər və turizm obyektləri xidmət səviyyəsini mükəmməl formada təşkil etmək və sosial məsafəni təmin edə bilmək üçün daha çox işçi götürməsi, o cümlədən menuda təbii qidalara üstünlük verməsi də xərcləri ikiqat artırıb.

Hətta indi otellərin doluluq səviyyəsi də əvvəlki kimi deyil. Müəyyən izolyasiya qaydalarına riayət etmək məcburiyyəti tam doluluğa icazə vermir. Bu da qiymət artımına təsir edən amildir.

Əvvəllər bölgələrə böyük avtobuslarla turlar təşkil edilirdisə, bu artıq kiçikhəcmli nəqliyyat vasitələri ilə həyata keçirilir. Əvvəl turun qiyməti 15-20 manat aralığında idisə, hazırda bu qiymət 50-60 manat təşkil edir. Bunlar da öz növbəsində qiymət artımı deməkdir”.

Bəzən bölgələrdəki otellər dolu olduğundan turistlər kirayə verilən fərdi evlərə üz tuturlar. Bu da evlərini turistlərə kirayə vermək istəyən vətəndaşların sayını artmasına səbəb olur.

Ekspertin sözlərinə görə, hazırda bölgələrdəki evlərin kirayə qiyməti 20-80 manat aralığındadır:

"Bölgələrdə evlər 20 manatdan başlayaraq 70-80 manatadək bahalaşır. Birotaqlı evlərin qiyməti 20 manat, 3 otaqlı 50 manat, 4-5 otaqlı evlər isə 70-100 arasındadır”.

Mövzu ilə bağlı BAKU.WS-ə danışan Azərbaycan Turizm Agentlikləri Assosiasiyasının üzvü Aidə Əliyeva bölgələrdəki 4, 5 ulduzlu otellərdə 2 nəfərin istirahətinin orta hesabla 90 manata başa gəldiyini bildirib:
"4 ulduzlu oteldə 4 nəfərlik istirahət 150-160 manat təşkil edir. Bu, daha çox Quba bölgəsinə aiddir. 2 nəfərlik istirahətin məbləği isə 90 manatdır.

Astara Lənkəran bölgəsinə gəlincə isə, 2 nəfərin istirahəti 80-90 manat təşkil edir. Ailəvi koteclərin qiyməti 170-200 manat aralığındadır. Şəkidə fəaliyyət göstərən otellərdə isə 2 nəfərin istirahəti (səhər yeməyi də daxil olmaqla) 90-100 manat civarındadır".

Ötən il ilə müqayisədə hazırda yerli turizm obyektlərinin qiymətlərində 15-25% artım var, bu da sırf turizm obyektlərindəki tətbiq edilən izolyasiya və sosial məsafə qaydalarının tətbiqinin qiymətə təsiri ilə əlaqədardır.
Xəbər 61 dəfə oxunub.

YAZARLARIMIZ

SEÇİLMİŞ

SON XƏBƏRLƏR